"საქართველომ თავში ჩაარტყა ისრაელის ბიზნესს, ახლა ებრაელი ბიზნესმენები აკეთებენ იგივეს საქართველოს მიმართ და ამით ხურდას გვიბრუნებენ", - ასე პასუხობს კონფლიქტოლოგი პაატა ზაქარეიშვილი ისრაელში მოქმედი კერძო კომპანიების წარმომადგენელთა აფხაზეთში გახშირებულ ვიზიტებს.
კონფლიქტოლოგი აღნიშნულ ფაქტს ქართველი სამართალდამცველების მიერ ებრაელი ბიზნესმენების დაკავებას უკავშირებს და აღნიშნავს, რომ "ეს იყო არასწორი გადაწყვეტილება, რომელმაც ისრაელის კერძო სექტორს ხელ-ფეხი გაუხსნა საქართველოს ოკუპირებულ ტერიტორიაზე ფული იშოვოს".
"ვფიქრობ, რომ ებრაელი ბიზნესმენების დაპატიმრებით საქართველოს ხელისუფლებამ დანაშაულის პროვოცირება მოახდინა. ჩვენ თავში ჩავარტყით ისრაელის ბიზნესს და ახლა იგივეს გვიკეთებენ ებრაელი ბიზნესმენები. საქართველოს არასწორმა პოლიტიკამ ისრაელის კერძო სექტორს ხელ-ფეხი გაუხსნა იშოვოს ფული, მათ შორის აკრძალულ ტერიტორიაზე და რატომ გაუშვებს ამ შანსს ხელიდან? კატეგორიულად გამოვრიცხავ, რომ საქართველოსა და ისრაელს შორის არსებული ეს ვითარება პოლიტიკურ ცვლილებებსაც გამოიწვევს და ოფიციალური ისრაელი აღიარებს ჩვენი ქვეყნის ოკუპირებული ტერიტორიების დამოუკიდებლობას, მაგრამ იქ ებრაელური ბიზნესი ფეხს ნამდვილად მოიკიდებს", - განუცხადა პაატა ზაქარეიშვილმა "ჯი-ეიჩ-ენს".
რაც შეეხება უცხოური მედიით გავრცელებულ ინფორმაციას, რომ აფხაზეთმა ებრაულ ჰოლდინგ "Global CST"-ისგან შესაძლოა იარაღი შეიძინოს, კონფლიქტოლოგი აღნიშნულს ნაკლებსავარაუდოდ მიიჩნევს, თუმცა აცხადებს, რომ ასეთ შემთხვევაში, შეიარაღების შეძენა რუსული ფულით მოხდება.
"აფხაზეთის ე.წ. ხელისუფლებას იარაღის შეძენის არც სურვილი აქვს და არც ფინანსები. აფხაზეთში ახალი იარაღი რუსეთს სჭირდება, თუმცა თავად ვერ შეიტანს. ასე რომ, თუ იმასაც გავითვალისწინებთ, რომ ისრაელში რუსულ ბიზნესს კარგად აქვს ფეხი მოკიდებული, არ არის გამორიცხული იარაღის შეძენა მართლაც მოხდეს, თუმცა ამის უკან, კიდევ ვიმეორებ, აფხაზეთის დე-ფაქტო ხელისუფლება კი არა, მოსკოვი უნდა მოვიაზროთ", - აღნიშნა კონფლიქტოლოგმა.
შეგახსენებთ, რომ ბოლო ორი კვირის განმავლობაში აფხაზეთში ისრაელიდან ორი დელეგაცია იმყოფებოდა. აღნიშნულს უკვე მოჰყვა გამოხმაურება თავად ოფიციალური თელ-ავივის მხრიდან, რომელმაც განმარტა, რომ დელეგაციები ქვეყნის კერძო სექტორს წარმოადგენენ და მათ ისრაელის ხელისუფლებასთან კავშირი არ აქვთ.
