რუსეთის საგარეო საქმეთა მინისტრმა ანდრიი სიბიჰამ განაცხადა, რომ რუსეთის მიერ უკრაინის წინააღმდეგ განხორციელებული ტერორი მთელ ევროპის კონტინენტს ბირთვული ავარიის საფრთხის წინაშე აყენებს. ამის შესახებ სიბიჰა Х-ზე წერს.
მან აღნიშნა, რომ რუსეთმა ბოლო დროს გააძლიერა თავდასხმები უკრაინის ატომურ ენერგეტიკულ სისტემაზე, რაც ბირთვული ავარიის პირდაპირ საფრთხეს ქმნის.
სიბიჰას თქმით, ავარია მხოლოდ უკრაინელი ატომური ენერგიის სპეციალისტების პროფესიონალიზმის წყალობით არ მომხდარა.
მინისტრმა განაცხადა, რომ რუსეთის ბოლოდროინდელი თავდასხმები აიძულებს უკრაინის სამ მოქმედ ატომურ ელექტროსადგურს შეამცირონ სიმძლავრე, ზოგჯერ გამოიწვიონ ავტომატური საგანგებო გამორთვა, შეამცირონ წარმოება ან გათიშონ აგრეგატები - და თითოეული ასეთი სიტუაცია პირდაპირ საფრთხეს უქმნის.
გარდა ამისა, ატომური ენერგიის საერთაშორისო სააგენტომ ცოტა ხნის წინ როვნოსა და ხმელნიცკის ობიექტებთან ახლოს მრავალრიცხოვანი დრონების ფრენა დააფიქსირა, რაც უსაფრთხოების მნიშვნელოვან საფრთხედ არის კლასიფიცირებული.
„რუსული ტერორიზმი მთელ ევროპას ბირთვული ავარიის საფრთხის ქვეშ აყენებს - პარტნიორებმა და მედიამ ყურადღება უნდა მიაქციონ და მიიღონ ზომები მოსკოვში ბირთვული ტერორისტების შესაჩერებლად.“ - წერს სიბიჰა.
მისი თქმით, გადაწყვეტილებები უკვე არსებობს: „როსატომის“ წინააღმდეგ სანქციები, უკრაინის მიერ შეთავაზებული ცვლილებები ატომური ენერგიის საერთაშორისო სააგენტოს წესდებაში და უკრაინის დამცველებისთვის გაძლიერებული საჰაერო თავდაცვა, რათა თავიდან იქნას აცილებული რუსეთის მიერ ბირთვულ ენერგოსისტემაზე დარტყმები.
უკრაინის პრეზიდენტმა ვოლოდიმირ ზელენსკიმ შაბათს განაცხადა, რომ 7 თებერვალს რუსეთის მიერ განხორციელებული დარტყმების შედეგად, უკრაინის ატომური ელექტროსადგურის ბლოკებმა შეამცირეს გენერაცია და ერთი ბლოკი ავტომატურად გაითიშა.
