2 ივნისს გაერომ, ანკარის მოთხოვნით, თურქეთის სახელწოდება უცხოურ ენებზე დაარეგისტრირა, როგორც Türkiye.
უცხოურ ენებზე თურქეთის სახელწოდების ცვლილება შესაძლოა უკავშირდებოდეს ხელისუფლების გაღიზიანებას ინდაურთან არასახარბიელო ასოციაციის გამო. როგორც ცნობილია, თურქეთის ინგლისურენოვანი სახელწოდება Tukrey ინდაურს ნიშნავს.
ისტორიულად, ქვეყნის დასახელებების ცვლილებას სხვადასხვა მიზეზი განაპირობებდა. მაგალითისთვის, კოლონიური მმართველობისგან გათავისუფლება, დაშლილი ფედერაციული სახელმწიფოს შემადგენლობიდან გამოსვლა, შიდა პოლიტიკური რეჟიმის ცვლილება და სხვა.
თურქეთი არ არის ერთადერი ქვეყანა, რომელმაც ბოლო ათწლეულების განმავლობაში დასახელება შეიცვალა.
ჩრდილოეთ მაკედონია/მაკედონია
ქვეყნის დასახელების შეცვლის ერთ-ერთი უახლესი მაგალითია ჩრდილოეთ მაკედონია, რომელსაც უწინ მაკედონიის რესპუბლიკა ერქვა.
2019 წელს მაკედონიის რესპუბლიკა ოფიციალურად გახდა ჩრდილოეთ მაკედონიის რესპუბლიკა. სხვა ქვეყნებისგან განსხვავებით, ამ შემთხვევაში მოტივაცია პოლიტიკური იყო.
მაკედონია, რომელიც ნატოსა და ევროკავშირში გაწევრიანებისკენ ისწრაფვოდა, ცდილობდა საბერძნეთთან პრობლემური საკითხის გადაწყვეტას. ათენი წლების მანძილზე ხელს უშლიდა მაკედონიის ევროატლანტიკურ ინტეგრაციას, ქვეყნის სახელწოდების გამო. რადგან საბერძნეთის ერთ-ერთ რეგიონს მაკედონია ჰქვია, ათენი შიშობდა, რომ ერთხელაც შესაძლოა ჩრდილოეთ მაკედონიას ტერიტორიული პრეტენზიები წამოეყენებინა.
ესვატინი/სვაზილენდის სამეფო
2018 წლიდან სვაზილენდის სამეფოს სახელწოდება ესვატინი გახდა. სახელის შეცვლის გადაწყვეტილება მეფე მსვატი III-მ მიიღო, რომელიც ითვლება, რომ აფრიკის კონტინენტზე ერთადერთი აბსოლუტური მონარქია. მეფემ ქვეყნის სახელწოდების შეცვლის გადაწყვეტილება ბრიტანეთის გვირგვინისგან სახელმწიფოს დამოუკიდებლობის 50-ე წლისთავს დაამთხვია.
მეფე მსვატიმ გადაწყვეტილების განმარტებისას განაცხადა, რომ ქვეყნის ინგლისურენოვანი დასახელება უცხოელებში დიდ დაბნეულობას იწვევდა, რადგან სვაზილენდი და შვეიცარია ინგლისურად იწერება და გამოითქმის თითქმის ერთნაირად - Swaziland და Switzerland.
შრი-ლანკა/ცეილონი
თავდაპირველად პორტუგალიის, შემდეგ ნიდერლანდებისა და ბოლოს ბრიტანეთის კოლონიამ რამდენჯერმე შეიცვალა სახელი.
მე-16 საუკუნეში კუნძულოვანი სახელმწიფო პორტუგალიელებმა დაიკავეს და დაარქვეს სახელად Ceilão, ძირძველი მოსახლეობის, სინჰალელთა სახელის მიხედვით. შემდგომში, ეს სიტყვა ბრიტანელებმა ინგლისურად თარგმნეს, როგორც Ceylon.
1948 წელს ქვეყანამ მოიპოვა დამოუკიდებლობა და ცნობილი გახდა, როგორც ცეილონის დომინიონი, რითაც ბრიტანეთის მონარქი ოფიციალურად კვლავ რჩებოდა სახელმწიფოს მეთაურად.
1972 წელს კონსტიტუციის მიღებით, ცეილონი გახდა შრი-ლანკის რესპუბლიკა, 1978 წელს კი შრი-ლანკის დემოკრატიულ-სოციალისტური რესპუბლიკა.
სიტყვა "ცეილონი" კვლავ გამოიყენება ჩაის ინდუსტრიაში.
მიანმარის კავშირის რესპუბლიკა/ბირმა
ქვეყანა, რომელსაც თავდაპირველად ბირმა ერქვა, დღეს ცნობილია ორი სახელით: მიანმარი (სრული სახელწოდება მიანმარის კავშირის რესპუბლიკა) და ბირმა.
პირველად სახელმწიფოს სახელი ეწოდა 1962 წელს - ბირმის კავშირის სოციალისტური რესპუბლიკა.
1980-იან წლებში ქვეყანაში სამხედრო დიქტატურა დამყარდა. ბირმის კავშირი 1989 წელს ხდება მიანმარი, რაც ნიშნავს "სწრაფს, ძლიერს". სახელის შეცვლა რამდენიმე ქვეყანამ, მათ შორის საფრანგეთმა, იაპონიამ და გაერომ აღიარა. შეერთებული შტატები და დიდი ბრიტანეთი არ დაეთანხმნენ მსგავს ცვლილებას.
ახლა სახელმწიფოს მიანმარის კავშირის რესპუბლიკას უწოდებენ, თუმცა ამ სახელწოდებას არ ცნობს ზოგიერთი ქვეყანა, ისევე როგორც ძირითადი დასავლური მედია და საზოგადოებრივი ორგანიზაციები.
ნიდერლანდები/ჰოლანდია
2020 წლის დასაწყისიდან, ნიდერლანდების ხელისუფლების გადაწყვეტილებით, ქვეყნის ერთ-ერთი სახელწოდების "ჰოლანდიის" გამოყენება შეწყდა.
გადაწყვეტილების გამოცხადებისთანავე, საელჩოებს, სამინისტროებს, უნივერსიტეტებსა და სხვა საჯარო თუ კერძო დაწესებულებებს, მიეცათ მითითება, ქვეყნის სახელწოდების სახით მხოლოდ "ნიდერლანდები" გამოეყენებინათ.
ხელისუფლება თვლიდა, რომ ქვეყნის იმიჯს განახლება სჭირდებოდა, რადგან "ჰოლანდია" ხშირ შემთხვევაში ტურისტებისთვის ნარკოტიკებთან და ამსტერდამის "წითელი ფარნების უბანთან" ასოცირდება.
ირანი/სპარსეთი
სპარსეთი ამ ქვეყანას ძველმა ბერძნებმა შეარქვეს. ამ სახელწოდებით სახელმწიფო არსებობდა მეოცე საუკუნის პირველ მესამედამდე.
1935 წლის 21 მარტს მთავრობამ დააკანონა სახელი ირანი, რომელიც დაამტკიცა შაჰმა, მუჰამედ რეზა ფეჰლევმა.
ირანი არის ინტერპრეტაცია სახელწოდებისა Airyana Vaeja-ი ან Aryānām-ი, რაც "არიელთა მიწას", "არიულ მიწას" ნიშნავს. ისტორიულ წყაროებში ქვეყნის სახელად ასევე მოხსენიებულია Erānšahr, რაც ქართულად ითარგმნება, როგორც "ერანი".
სახელის ოფიციალური ცვლილების შემდეგ, თავდაპირველად, საერთაშორისო ასპარეზზე გამოიყენებოდა როგორც სპარსეთი, ასევე ირანი. რევოლუციისა და შაჰის დამხობის შემდეგ, ქვეყნის ოფიციალური დასახელება ირანის ისლამური რესპუბლიკა გახდა.
ირანში წარმოებულ პროდუქციას ძირითადად მაინც მოიხსენიებენ, როგორც სპარსულს, და არა ირანულს.
