ესპანეთის მთავრობამ შეიწყალა 9 კატალონიელი პოლიტიკოსი, რომელთაც ბრალად კატალონიის დამოუკიდებლობის შესახებ უკანონო რეფერენდუმის ორგანიზება და ამბოხება ედებოდათ.
პრემიერ-მინისტრ პედრო სანჩესის განცხადებით, სეპარატისტი პოლიტიკოსების გათავისფლება ხელს შეუწყობს დაძაბულობის შემცირებას.
"რომელიმე მხარეს უნდა გადაედგა დეესკალაციისკენ მიმართული პირველი ნაბიჯი. ეს ნაბიჯი ესპანეთის მთავრობამ გადადგა. ეს გადაწყვეტილება თანაცხოვრების აღდგენის საჭიროებიდან გამომდინარეობს", - განაცხადა სანჩესმა.
შეწყალების აქტის შესაბამისად, გაუქმდება სასჯელი, რომელიც თავისუფლების აღკვეთას ითვალისწინებდა, თუმცა მსჯავრდებულებს თანამდებობის დაკავების უფლება კვლავ არ ექნებათ.
პოლიტიკოსების გათავისუფლებამდე, შეწყალების აქტს ხელი ჯერ ესპანეთის მონარქმა უნდა მოაწეროს, შემდეგ კი იგი ოფიციალურ ორგანოში უნდა გამოქვეყნდეს.
2017 წლის პირველ ოქტომბერს კატალონიაში ჩატარდა დამოუკიდებლობის რეფერენდუმი, სადაც ამომრჩეველთა 90%-ზე მეტმა მხარი რეგიონის დამოუკიდებლობას დაუჭირა. აღსანიშნავია, რომ ამომრჩეველთა აქტივობამ მხოლოდ 43% შეადგინა.
მოგვიანებით რეფერენდუმის შედეგები ესპანეთის საკონსტიტუციო სასამართლომ ბათილად ცნო.
2017 წლის 27 სექტემბერს კატალონიის პარლამენტის მმართველმა პოლიტიკურმა ძალამ გამოაცხადა რეგიონის დამოუკიდებლობა ცენტრისგან.
ამის გამო აღშფოთებულმა მადრიდმა მიმართა ესპანეთის სენატს კონსტიტუციის 155-ე მუხლის ამოქმედების მხარდაჭერისთვის, რითაც ცენტრალური მთავრობა კატალონიაზე პირდაპირი მმართველობის დამყარების უფლებას მოიპოვებდა.
ესპანეთის მთავრობამ გაათავისუფლა კატალონიის ლიდერები, დაითხოვა პარლამენტი და მოიწვია ვადამდელი რეგიონალური არჩევნები 2017 წლის 21 დეკემბერს, რომელშიც ნაციონალისტურმა პარტიებმა გაიმარჯვეს.
კატალონიის ყოფილი პრეზიდენტი პუჩდემონი ბრიუსელში გაიქცა, მას შემდეგ, რაც ოფიციალურმა მადრიდრმა კატალონიის რეგიონზე პირდაპირი კონტროლი დაამყარა და რეგიონის ლიდერების გასამართლება დაიწყო. მათ ბრალად ამბოხება და ამბოხებისაკენ მოწოდება ედებოდათ.
2019 წლის ოქტომბერში, ესპანეთის უზენაესმა სასამართლომ 9 კატალონიელ პოლიტიკოსსა და აქტივისტს თავისუფლების აღკვეთა მიუსაჯა ვადით 9-დან 13 წლამდე.
