თრომბოემბოლიურ გართულებებთან დაკავშირებული შეშფოთების გათვალისწინებით, ნიდერლანდებმა დროებით შეაჩერა ასტრაზენეკას მიერ წარმოებული პრეპარატით ვაქცინაციის პროცესი, მიუხედავად ევროპის მედიკამენტების სააგენტოს რეკომენდაციისა, რომ ვაქცინის უპირატესობა აღემატება პოტენციურ რისკებს.
ნიდერლანდების მთავრობა იტყობინება, რომ ქვეყნის სამედიცინო საშუალებების სამმართველოს რეკომენდაციით, ასტრაზენეკას ვაქცინის გამოყენება შეჩერდა ორი კვირის განმავლობაში, 28 მარტამდე.
მანამდე, ასტრაზენეკას პრეპარატით ვაქცინაცია შეაჩერეს ან შეზღუდეს ირლანდიამ, ბულგარეთმა, დანიამ, ნორვეგიამ, რუმინეთმა, ისლანდიამ.
რამდენიმე დღის წინ, ასტრაზენეკას ვაქცინის გამოყენება შეაჩერა ტაილანდმაც, თუმცა ცნობილი გახდა, რომ დღეიდან მან კვლავ განაახლა ამ პრეპარატის გამოყენება.
ჯანმრთელობის მსოფლიო ორგანიზაციის მტკიცებით, არ არსებობს მითითება იმასთან დაკავშირებით, რომ თრომბი, რომელიც ზოგიერთ ვაქცინირებულ პაციენტში გამოვლინდა, ამ ვაქცინას უკავშირდება.
ამ პოზიციას იზიარებს, ევროკავშირის მთავარი მარეგულირებელი, ევროპის მედიკამენტების სააგენტო, რომლის განცხადებითაც, არ არსებობს მტკიცებულება, რომ უშუალოდ "ასტრაზენეკას" ვაქცინამ გამოიწვია თრომბოემბოლია.
ვაქცინის ირგვლივ მიმდინარე მოვლენებს გამოეხმაურა ფარმაცევტული კომპანია AstraZeneca, რომელიც აცხადებს, რომ ვაქცინირებულ ადამიანებში თრომბის შესახებ მტკიცებულება არცერთ შემთხვევაში დადასტურდა.
კომპანიის განცხადებით, ვაქცინირებულებს შორის თრომბის გაზრდილი რისკის შესახებ მტკიცებულება არც ერთ ასაკობრივ ჯგუფში არ გამოვლენილა.
