კორონავირუსის პანდემიის პირობებში ვირუსის კონტაგიოზურობისა და გავრცელების მოდელის გათალისწინებით, ძნელი წარმოსადგენია ამ ინფექციამ უკან დაიხიოს შესაბამისი პასუხის გარეშე. ასე მარტივად შემთხვევების განულება არ მოხდება, სამწუხაროდ. ამაზე, თითქმის თანხმდებიან მსოფლიო ეპიდემიოლოგები და ექსპერტები, - განაცხადა "ჯი-ეიჩ-ენთან" საუბარში ინფექციური პათოლოგიის, შიდსისა და კლინიკური იმუნოლოგიის ცენტრის ექიმმა-ეპიდემიოლოგმა, ნიუ-იორკის შტატის უნივერსიტეტის საზოგადოებრივი ჯანდაცვის სკოლის მაგისტრმა, ეკატერინე ქარქაშაძემ.
მისი თქმით, საწყის ეტაპზე ვირუსის შესაკავებლად და აგრეთვე, ინფექციის ფართოდ გავრცელების პრევენციისთვის ძალიან მნიშვნელოვანია თავყრილობების და მასობრივი შეკრების მაქსიმალური შეზღუდვა, დისტანცირება, კარანტინიც და სხვ. თუმცა მხოლოდ ეს შემაკავებელი ღონისძიებები არ არის საკმარისი.
„ ღონისძიებები უნდა იყოს მეტად მიზანმიმართული და არგუმენტებით გამყარებული და არა - აბსოლუტურად შემზღუდავი. გარდა ამისა, უნდა არსებობდეს გაწერილი, ჩამოყალიბებული გეგმა, თუ რა უნდა გაკეთდეს კარანტინის პერიოდში. ეს შეიძლება იყოს ჰოსპიტალური მზადყოფნის ამაღლება, პერსონალის გადამზადება. მაგალითისთვის, გერმანიაში ე.წ. კარანტინის პერიოდის ერთ-ერთი მნიშვნელოვანი აქტივობა იყო სასუნთქი აპარატების მარაგის შევსება. მოკლედ რომ ვთქვა, ეს უნდა იყოს დროის მოგება უფრო მეტი მზადყოფნისთვის, აგრეთვე, მოსახლეობასაც კარგად უნდა მიეწოდოს ეს ინფორმაცია, თუ რატომ არის მსგავსი შეზღუდვები და კონკრეტულად რა ნაბიჯებს დგამს ამ პერიოდში ხელისუფლება.
