ჩვენ ქვეყანაში ტყის ფონდის მიღმა, თუ არ ვიგულისხმებთ ამ ეტაპზე ქვეყნის გამთლიანებამდე ოკუპირებულ ტერიტორიებს, რეგისტრაციის ქვემდებარეა 3 მილიონ 400 ათასი ჰექტარი. აქედან დღეისათვის რეგისტრირებულია მილიონ 800 ათასი ჰექტარი, ხოლო მილიონ 600 ათასი ჰექტარი კვლავ არის დასარეგისტრირებელი, - განაცხადა იუსტიციის მინისტრობის კანდიდატმა თეა წულუკიანმა ოთხი კომიტეტის გაერთიანებულ სხდომაზე.
“ამ რეფორმაზე ხშირად ისმის კითხვა. პირველ რიგში, მაჟორიტარმა დეპუტატებმა იციან ჩვენსავით კარგად, რომ 2016 წელს ის რეფორმა, რომელიც ჩავრთეთ მიწის რეგისტრაციაში, არის წარმატებული. ამაზე მეტყველებს, თუნდაც, ის რიცხვი, რომ 2016-2019 წლებში, სამი წლის განმავლობაში, დარეგისტრირდა 711 ათასი მიწის ნაკვეთი. ე.ი. 711 ათასმა ადამიანმა, რომლებიც მანამდე, უბრალოდ, გართულებული რეგისტრაციისა და მრავალი ბიუროკრატიული წესის გამო ვერ ხდებოდნენ მიწის მესაკუთრე, ახლა დაირეგისტრირა. ეს არის ნახევარ მილიონზე მეტი ჰექტარი, რაც ასე, ერთი შეხედვით, ბევრი არ არის, მაგრამ, ინდივიდების საკუთრების უფლების ოდენობის მიხედვით, 711 ათასი ადამიანი დიდი რიცხვია. რეფორმის წარმატებაზე მეტყველებს ისიც, რომ დამოუკიდებლობის აღდგენიდან დღემდე რეგისტრირებულია მილიონ 800 ათასი ნაკვეთი და აქედან 711 ათასი რეგისტრირებულია ბოლო სამი წლის განმავლობაში. შესაბამისად, ამ რეფორმამ, რომელიც პარლამენტის თხოვნით არაერთხელ გავაგრძელეთ, აჩვენა, რომ რეგისტრაციის პროცესი დაჩქარდა. რაც შეეხება ხარვეზებს, აქ მაჟორიტარმა დეპუტატმა სწორად დასვა კითხვა, რომ დარჩენილია სერიოზული ნაწილი მიწებისა, რომლებიც ვერ რეგისტრირდება. უნდა ვთქვა, რომ, სამწუხაროდ, ამ პრობლემების 90 პროცენტი ეხება აღიარების კომისიებს, რომლებიც მუნიციპალიტეტებში მოქმედებს. ჩვენ ამასწინათ ვიმსჯელეთ იმაზე, თუ აღმასრულებელი ხელისუფლება როგორ შეიძლება ჩაერთოს ისე, რომ ადგილობრივი თვითმმართველობის ფუძემდებლური პრინციპები არ დაირღვეს და გაააქტიუროს აღიარების კომისიები. მაგალითად, იმ ადამიანს, რომელზეც აქ ითქვა, შეიძლება საბუთი არ აქვს, მაგრამ ყველამ იცის, რომ ის მიწა მისია, უღიაროს მუნიციპალიტეტმა მისი საკუთრების უფლება, რა შემთხვევაშიც მარტივად შეიძლება შემდეგ მიწის დარეგისტრირება. ამის შესახებ მიწის რეგისტრაციის შესახებ კანონში ცვლილებები შემოვა, გამარტივებული წესებიც იქნება თქვენ წინაშე წარმოდგენილი, მაგალითად, მებაღის წიგნაკთან დაკავშირებული, ძალიან ბევრი სავალდებულო რეკვიზიტი იქნება მოხსნილი და სხვა“, - თქვა წულუკიანმა.
