700-ზე მეტი მტკიცებულება 2008 წლის ომის შესახებ წარდგენილია სტრასბურგის სასამართლოსთვის და ვართ უფრო მყარად ჩვენს პოზიციებში, - განაცხადა იუსტიციის მინისტრობის კანდიდატმა თეა წულუკიანმა ოთხი კომიტეტის გაერთიანებულ სხდომაზე.
„სტრასბურგის სასამართლოში ჩვენ, თუკი მხოლოდ ომის საქმეებით შემოვიფარგლებით, ჩემი ოპტიმისტური გათვლებით, გადაწყვეტილება უკვე უნდა იყოს ომის საქმეზე წელს. თუკი სტრასბურგის სასამართლო საქმის გადატვირთულობის გამო ამას ვერ შეძლებს, გაისად მაინც საქართველოში არჩევნებამდე გადაწყვეტილება გამოტანილი უნდა იყოს. ეს არის მეორე სახელმწიფოთაშორისი საქმე, რომელიც 2008 წელში შეიტანა მაშინდელმა ხელისუფლებამ სტრასბურგის სასამართლოში და ეხება რუსეთ-საქართველოს ომს. მოლოდინი გვაქვს პოზიტიური, თუმცა, რა თქმა უნდა, ჩვენი მოწინააღმდეგე, მოპასუხე სახელმწიფოც იმავეს აცხადებს, რაც სასამართლო დავაში ბუნებრივია და ჩვენ ჩვენი არგუმენტებით ვიბრძვით, რათა დავამტკიცოთ ის, რაც არის სიმართლე − იქნება ეს ეთნიკური წმენდა თუ ჩვენი ტყვეების სიცოცხლისა და ღირსების უფლების დარღვევა. ჰააგის სასამართლოშიც გრძელდება გამოძიება. ჩვენ გამოძიებაში ვთანამშრომლობთ ჰააგის პროკურატურასთან, რაც არაერთხელ განმიცხადებია, ორი მიმართულებით. ეს არის ქართველების ეთნიკური წმენდა და სამხედრო ტყვეების წამება და მოკვდინება. ეს არის ჩვენთვის ორი მთავარი პრიორიტეტი. ბოლოს პრემიერ-მინისტრთან ერთად ნიუ-იორკში შევხვდით ჰააგის პროკურორს, ქალბატონ ფატუ ბენსუდას რამდენიმე თვის წინ. მან, რა თქმა უნდა, ისე, რომ ვერ გვიმჟღავნებს და არ გაგვიმჟღავნებს გამოძიების დეტალებს, გვითხრა, რომ ამ ორი მიმართულებით გამოძიება საკმაოდ აქტიურია და წინ არის წასული. ამაზე მეტ ინფორმაციას ჩვენ არ ვფლობთ, თუმცა, დროდადრო ვიღებთ მისგან დახმარების მოთხოვნებს ამა თუ იმ მოწმის დაკითხვაში მხარდაჭერის კუთხით და ამ დახმარებებს ხელისუფლების სხვა შტოებთან თანამშრომლობით ვპასუხობთ. ბოლო ასეთი შემთხვევა გვქონდა პარლამენტთან თანამშრომლობის დარგში. მტკიცებულებებს რაც შეეხება, ძალიან ხშირად, გეთანხმებით, გვსმენია, რომ ის, თუ როგორ არის მართული ეს საქმეები საერთაშორისო დონეზე, ოპონენტებს აქვთ ხოლმე კითხვის ნიშნები. ეს, მე ვიტყოდი, არის მათი ჩვეული სიცრუის მანქანისა და პროპაგანდის ნაწილი, რადგან საკმარისია, გავიხსენოთ ის, რომ, თუნდაც, ომის საქმეზე ჰააგის სასამართლოში ჩვენ მოგვიწია 700-ზე მეტი მტკიცებულების მოპოვება და წარდგენა 10 წლის შემდეგ. ეს ნებისმიერი გამოძიების დროს არის რთული საქმე, რადგან დრო გამოძიების წინააღმდეგ მუშაობს ყოველთვის. ის ელემენტარული მტკიცებულებები, რომლებიც მაშინდელ ხელისუფლებას, დარჩა რა ომის შემდეგ კიდევ 4 წელი ხელისუფლებაში, შეეძლო, მარტივად შეეგროვებინა, პროცესუალურად დაემაგრებინა და ჩვენ შემდეგ მოგვცემოდა მარტივად ამის გამოყენების საშუალება. ჩვენ ეს ფუფუნება არ გვქონია. უფრო მეტიც, თქვენ გახსოვთ, მინისტრის საათის დროს მე ამაზე დეტალურად ვისაუბრე. ჩვენ ისიც კი მოგვიწია, რომ ჩვენს სტრატეგიულ პარტნიორთან 10 წლის მერე დაგვეწყო მოლაპარაკებები და განგვეახლებინა საუბარი იმაზე, რომ ომის დღეებში საქართველოდან გატანილი „ისკანდერი“ დაგვებრუნებინა. ეს არის ის „ისკანდერი“, რომელიც 12 აგვისტოს გორში ჩამოვარდა და ჩვენ ვეძებდით, თუ სად იყო ის. რომ არა სუს-ის და სხვა უწყებების ძალიან ნაყოფიერი თანამშრომლობა იუსტიციის სამინისტროსთან, მათ შორის, ყოფილი, რიგითი თანამშრომლების, რომელთაც ინსტიტუციური მეხსიერება აქვთ, იმასაც კი ვერ გავიგებდით, რადგან ელემენტარულად მიღება-ჩაბარების აქტიც კი არ იყო გაფორმებული ქვეყნის ტერიტორიიდან ამის გატანისას, თუ სად იმყოფებოდა ეს მნიშვნელოვანი მტკიცებულება. ეს ტვირთი ჩამოტანილ იქნა. მანამდე რუსეთი გვსაყვედურობდა, რომ ეს იყო ფოტოშოპი და არანაირი „ისკანდერი“ გორში არ ჩამოვარდნილა. 700-ზე მეტი მტკიცებულება, მსგავსი და სხვა ტიპის იქნა წარდგენილი და ჩვენ დღეს, რა თქმა უნდა, ვართ უფრო მყარად ჩვენს პოზიციებში. თუმცა, ასე მყარად ამ პოზიციაში ყოფნა იმ ხელისუფლებასაც შეეძლო, რომელიც უშუალოდ ომის დროს იმყოფებოდა ხელისუფლებაში“, - განაცხადა წულუკიანმა.
