პოლიტოლოგი მამუკა არეშიძე გაეროს საერთაშორისო სასამართლოს მიერ კოსოვოს აღიარების დაკანონებასთან დაკავშირებულ დასკვნას აფასებს. პოლიტოლოგის განცხადებით, კოსოვოს პრეცედენტს საქართველოს ოკუპირებული ტერიტორიების დამოუკიდებლობის მოთხოვნასთან საერთო არაფერი აქვს. ამის შესახებ არეშიძემ "ჯი-ეიჩ-ენთან" საუბარში განაცხადა.
პოლიტოლოგმა აფხაზეთის ე. წ. პრემიერ-მინისტრის, სერგეი შამბას განცხადებაზე გააკეთა კომენტარი და აღნიშნა, რომ შამბას აღნიშნული განცხადება შიდა მოხმარებაზეა გათვლილი და მისი ადრესატები აფხაზეთის ე. წ. რესპუბლიკის მოქალაქეები არიან.
"შამბას ეს განცხადება შიდა მოხმარებაზეა გათვლილი, ანუ თავის საზოგადოებაზე. დავიწყოთ იქიდან, რომ გაეროს საერთაშორისო სასამართლომ კოსოვოსთან დაკავშირებით მხოლოდ დასკვნა გამოაქვეყნა და მას არანაირი იურიდიული ძალა არ გააჩნია. ამასთან, განსხვავება კოსოვოს, აფხაზეთისა და ე. წ. სამხრეთ ოსეთის შემთხვევბს შორის მაინც არსებობს, რადგან კოსოვოში ადგილობრივი მოსახლეობის ეთნოწმენდა მოხდა, ხოლო აფხაზეთში პირიქით - ქართველების. საკითხს თუ ჰუმანიტარულად მივუდგებით, რა თქმა უნდა, იქ აფხაზებიც დაზარალდნენ, ქართველებიც და ოსებიც, მაგრამ თუ საერთაშორისო სამართლით შევხედავთ, ამ ორ შემთხვევას შორის არანაირი მსგავსება არ არსებობს", - განუცხადა "ჯი-ეიჩ-ენს" არეშიძემ.
შეგახსენებთ, რომ აფხაზეთის ე. წ. პრემიერმა, შამბამ ადგილობრივი მედიის წარმომადგენლებს განუცხადა, რომ ჰააგის სასამართლოს გადაწყვეტილება აფხაზეთის არგუმენტებს უფრო მეტ წონას სძენს.
"იმ შემთხვევაში, თუ აფხაზეთი ჰააგის სასამართლოს მიმართავს, დარწმუნებული ვარ, ჩვენ შესახებაც მსგავს გადაწყვეტილებას მიიღებენ. ჩვენ კოსოვოზე მეტი ისტორიული, იურიდიული და მორალური საფუძველი გვაქვს იმისათვის, რომ ჩვენი დამოუკიდებლობა აღიარონ", - განაცხადა შამბამ და დასძინა, რომ გაეროს სასამართლოს გადაწყვეტილების შემდეგ ექსპერტები ძველებური კატეგორიული ტონით ვეღარ იტყვიან, რომ აფხაზეთს თვითგამორკვევისა და დამოუკიდებლობის უფლება არა აქვს.
