"ირანზე თვადასხმისთვის, თუ ეს მოხდა, აშშ-ს გადასარევი პლაცდარმი აქვს როგორც ირანის მეზობელი ერაყის ტერიტორიაზე, ისე ირანის მეზობელი ავღანეთის ტერიტორიაზე. გარდა ამისა, ასეთივე მომზადებული ინფრასტრუქტურა აქვს სპარსეთის ყურის არაბულ სახელმწიფოებში, იქნება ეს კუვეიტი თუ სხვა. ამასთან, სპარსეთის ყურეში მუდმივად კუსირებს ამერიკის ფლოტი თავისი ავიამზიდით. ასე რომ, ირანზე შეტევის განხორციელებისთვის აშშ-ს, წესით, საქართველოს ტერიტორია არ უნდა სჭირდებოდეს. ერთადერთი ინფრასტრუქტურული ობიექტი, რომელიც შესაძლოა ასეთ საქმეში გამოიყენოს შეერთებულმა შტატებმა, ეს არის მარნეულის აეროდრომი და არაფერი საჭიროება ჩემ მიერ ჩამოთვლილი ობიექტების შემდეგ მარნეულის აეროპორტს არ აქვს", - განაცხადა არეშიძემ "ჯი-ეიჩ-ენთან" საუბარში.

ექსპერტის აზრით, ამ ეტაპზე, ირანისა და აშშ-ის შესაძლო ომის ნიშნებიც არ ჩანს, რადგან აშშ სხვა სამხედრო მოქმედებებითაა დაკავებული.

"ვერ ვხედავ იმის ნიშნებს, რომ შტატების დღევანდელი ადმინისტრაცია ასეთ ნაბიჯს გადადგამს მაშინ, როცა ის ჩართულია ისეთ მასშტაბურ სამხედრო კონფლიქტში, როგორიც არის ავღანეთი და ერაყი. თვითონ ამერიკის დღევანდელი ადმინისტრაციის საგარეო კურსი მაფიქრებინებს, რომ ისინი ამ ეტაპზე საომარი მოქმედებებისკენ ნაბიჯებს არ დგამენ", - განაცხადა არეშიძემ.

შეგახსენებთ, რომ ცნობილმა აზერბაიჯანელმა პოლიტოლოგმა ზარდუშტ ალიზადემ ვესტი.აზ-თან საუბარში არ გამორიცხა აშშ-ის მხრიდან ირანის წინააღმდეგ სამხერო ოპერაციის განხორციელება და ირანისგან თბილისისა და ბაქოსთვის საპასუხო დარტყმების განხორციელების საფრთხეებზედაც ისაუბრა

მისი თქმით, აშშ და ისრაელი უკვე არაერთი ათეული წელია ემზადებიან ირანისთვის სამხედრო დარტყმისთვის, თუმცა ბოლო მოვლენების გათვალისწინებით, ირანის წინააღმდეგ სამხედრო ოპერაცია, უახლოეს მომავალში გამორიცხული არ არის.

"თუ აზერბაიჯანი და საქართველო საკუთარ ტერიტორიებს აშშ-ისა და ისრაელის სამხედრო ნაწილებს ირანისთვის სამხედრო დარტყმის მისატანად დაუთმობენ, მაშინ თეირანმა შესაძლოა განახორციელოს ამ ქვეყნების მიმართ საპასუხო დარტყმები", - განაცხადა ალიზადემ.