აჭარის მთავრობამ 2011-2014 წლების პრიორიტეტები გამოაქვეყნა, რომლის მიხედვითაც ირკვევა, რომ აჭარის ხელისუფლების ნომერ პირველ პრიორიტეტად კვლავ ტურიზმის განვითარება რჩება. როგორც აჭარის ფინანსთა და ეკონომიკის სამინისტროში განმარტავენ, მთავრობის მთავარ მიზანს რეგიონის ტურისტული პოტენციალის სრული რეალიზების ხელშეწყობა წარმოადგენს, რაც ინფრასტრუქტურის მოწესრიგებით მიიღწევა,.

რეგიონის მთავარ პრიორიტეტად რჩება ასევე ადგილობრივი მოსახლეობის დასაქმება, შესაბამისად სოციალური და მატერიალური პირობების გაუმჯობესება.

"გასული საბიუჯეტო წლის რესპუბლიკური ბიუჯეტის საბოლოო შედეგების ანალიზი აჭარის ავტონომიური რესპუბლიკის 2009 წლის რესპუბლიკური ბიუჯეტის შემოსულობების შესრულებამ 118 793,2 ათასი ლარი შეადგინა, რაც 2008 წლის შესაბამის მაჩვენებელთან შედარებით 6,6 პროცენტით მეტია.

2009 წლის ავტონომიური რესპუბლიკის რესპუბლიკური ბიუჯეტის შემოსავლებმა 108 720,6 ათასი ლარი შეადგინა, რაც წინა წლის ანალოგიურ მაჩვენებელს 4,6 პროცენტით აღემატება;

ავტონომიური რესპუბლიკის რესპუბლიკური ბიუჯეტის შემოსავლების ძირითადი ნაწილი მოდის გადასახადებზე, რომელიც მოიცავს მხოლოდ საშემოსავლო გადასახადს. საანგარიშგებო პერიოდის საშემოსავლო გადასახადის ფაქტიურმა შესრულებამ 61 912,8 ათასი ლარი შეადგინა; სხვა შემოსავლების შესრულებამ 4 075,8 ათასი ლარი შეადგინა;
გრანტების სახით სახელმწიფო ბიუჯეტიდან მიღებული აქვს 42 732,0 ათასი ლარი;
არაფინანსური აქტივების კლებით (აქტივების გაყიდვა) რესპუბლიკურ ბიუჯეტში ჩაირიცხა 9 232,2 ათასი ლარი", _ განუცხადა სააგენტო "ჯი-ეიჩ-ენს" აჭარის ფინანსთა და ეკონომიკის მინისტრმა ვაჟა ბოლქვაძემ.

მინისტრის თქმით, 2009 წლის რესპუბლიკური ბიუჯეტით გამოყოფილი ასიგნებები სხვადასხვა სფეროების მიხედვით შემდეგნაირად გადანაწილდა: საერთო დანიშნულების სახელმწიფო მომსახურების აღმასრულებელი და წარმომადგენლობითი ორგანოების საქმიანობის უზრუნველყოფა, ფინანსური და ფისკალური საქმიანობა საერთო დანიშნულების მომსახურებისათვის 10 117,6 ათასი ლარი; ფულადი ტრანსფერები მუნიციპალიტეტებში 63 059,5 ათასი ლარი; ეკონომიკური საქმიანობა 13 864,2 ათასი ლარი, მათ შორის: სოფლის მეურნეობა, სატყეო მეურნეობა 2 212,7 ათასი ლარი, საავტომობილო ტრანსპორტი და გზები 9 239,1 ათასი ლარი, ეკონომიკის სხვა დარგები (ვაჭრობა,სასტუმროები, რესტორნები, ტურიზმი) 2 412,4 ათასი ლარი; გარემოს დაცვა 1 110,8 ათასი ლარი; ჯანმრთელობის დაცვა 2 950,0 ათასი ლარი; დასვენება, კულტურა და რელიგია 11 541,3 ათასი ლარი; განათლება 9 361 ათასი ლარი; სოციალური დაცვა 286,9 ათასი ლარი; ვალდებულებების მომსახურებასა და დაფარვაზე მიმართული იქნა 3 184,5 ათასი ლარი;