"მხოლოდ ის ერები იმსახურებენ პატივისცემას, რომლებიც მზად არიან საკუთარი ქვეყნისთვის თავი გაწირონ", - ამის შესახებ საქართველოს პრეზიდენტმა მიხეილ სააკაშვილმა დღეს საქართველოს ერთიანობისთვის და დამოუკიდებლობისთვის დაღუპულ გმირთა მემორიალის გახსნაზე განაცხადა.
"თუ ჩვენ ვფიქრობთ, რომ არ ვართ მზად ჩვენი ქვეყანა დავიცვათ, უნდა ვიცოდეთ, რომ ჩვენ საქმეს არავინ არავინ არ გააკეთებს და არავინ არ გაანძრევს ხელს. მხოლოდ ის ერები იმსახურებენ პატივისცემას, რომლებიც მზად არიან საკუთარი ქვეყნისთვის თავი გაწირონ. მხოლოდ იმ ერებს ეხმარებიან, რომლებიც მზად არიან, რომ დამპყრობელს არ შეეგუოს და თავი არ დახაროს. სწორედ ამიტომ არის, რომ საქართველო გადარჩა", - განაცხადა პრეზიდენტმა სააკაშვილმა სიტყვით გამოსვლის დროს.
ამასთან, პრეზიდენტის შეფასებით, მსოფლიომ დაინახა, რომ ყველაფრის მიუხედავად ეს ამაყი და მამაცი ერი, რომელსაც თავისზე დიდი ძალა ემუქრება და რომელმაც სხვა ერები გატეხა და კონტროლი დაამყარა ნამდვილი მონღოლური დაუნდობლობით, ერთადერთი ქართველი ერი ვერ გატეხა.
"ქართველი ერი არ გადატყდა და არ შეეგუა. ეს გახდა თავისუფლების, სიყვარულის და წარმატების სიმბოლო. ჩვენ ყოველთვის დავიცავთ ჩვენს სამშობლოს იარაღით ხელში, მაგრამ საბოლოო ჯამში ჩვენ მშვიდობით და წარმატებით გავიმარჯვებთ. რამდენი ახალი შენობა, ქალაქიც არ უნდა ავაშენოთ, რამდენი ახალი ესტაკადაც არ უნდა შევქმნათ, ჩვენ უნდა გესმოდეს, რომ ყველაფერის საწყისი ამ ბიჭების გმირობაზე გადის", - აღნიშნა პრეზიდენტმა.
