ისრაელმა შესაძლოა განაახლოს საბრძოლო მოქმედებები ღაზას სექტორში, თუ ჰამასი შაბათს, 15 თებერვლამდე მძევლებს არ გაათავისუფლებს .
ამის შესახებ ისრაელის პრემიერ-მინისტრმა ბენიამინ ნეთანიაჰუმ განაცხადა. იუწყება The Times of Israel.
„თუ ჰამასი არ დააბრუნებს ჩვენს მძევლებს შაბათს შუადღემდე, ცეცხლის შეწყვეტა გაუქმდება და ისრაელის თავდაცვის ძალები დაუბრუნდება ინტენსიურ საბრძოლო მოქმედებებს, ვიდრე ჰამასი საბოლოოდ არ განადგურდება“, - აღნიშნა ისრაელის პრემიერ-მინისტრმა.
.მანამდე ანალოგიური განცხადება აშშ-ის პრეზიდენტმა დონალდ ტრამპმა გააკეთა და მოითხოვა ჰამასის მიერ დაკავებული ყველა ისრაელელი მძევლის გათავისუფლება.
”თუ ისინი [მძევლები] არ დაბრუნდებიან, ნამდვილი ჯოჯოხეთი დატრიალდება”, - თქვა აშშ-ის პრეზიდენტმა და ვარაუდი გამოთქვა, რომ ბევრი მათგანი, რომელთა გათავისუფლებაც იყო დაგეგმილი, სინამდვილეში, შესაძლოა, ცოცხალი აღარ იყოს.
ამასთან, მან აღნიშნა, რომ შეთანხმების შესახებ საბოლოო გადაწყვეტილება ისრაელმა უნდა მიიღოს.
"მე ვლაპარაკობ ჩემი სახელით. ისრაელს შეუძლია გააუქმოს ეს [გადაწყვეტილება ცეცხლის შეწყვეტის შესახებ]", - თქვა აშშ-ის პრეზიდენტმა.
