აშშ-ის პრეზიდენტმა დონალდ ტრამპმა განაცხადა, რომ ისრაელსა და ჰამასს შორის ცეცხლის შეწყვეტის შესახებ შეთანხმება უნდა გაუქმდეს, თუ ღაზის სექტორში მყოფი ყველა მძევალი არ გათავისუფლდება "შაბათს შუადღემდე". იუწყება Associated Press
რამდენიმე აღმასრულებელი ბრძანების ხელმოწერის შემდეგ ჟურნალისტებთან შეხვედრისას ტრამპმა არაერთი რეზონანსული განცხადება გააკეთა ისრაელსა და ჰამასს შორის კონფლიქტში არსებულ ვითარებასთან დაკავშირებით.
ტრამპმა აღნიშნა, რომ ჰამასმა დაუყოვნებლივ უნდა გაათავისუფლოს ყველა მძევალი, წინააღმდეგ შემთხვევაში ცეცხლის შეწყვეტის შეთანხმება აზრს დაკარგავს.
”თუ ისინი [მძევლები] არ დაბრუნდებიან, ნამდვილი ჯოჯოხეთი დატრიალდება ”, - თქვა აშშ-ის პრეზიდენტმა და ვარაუდი გამოთქვა, რომ ბევრი მათგანი, რომელთა გათავისუფლებაც იყო დაგეგმილი, სინამდვილეში, შესაძლოა, ცოცხალი აღარ იყოს.
ამასთან, მან აღნიშნა, რომ შეთანხმების შესახებ საბოლოო გადაწყვეტილება ისრაელმა უნდა მიიღოს.
"მე ვლაპარაკობ ჩემი სახელით. ისრაელს შეუძლია გააუქმოს ეს [გადაწყვეტილება ცეცხლის შეწყვეტის შესახებ]", - თქვა აშშ-ის პრეზიდენტმა.
შეგახსენებთ, გუშინ ჰამასმა განაცხადა, რომ ისრაელის მიერ ცეცხლის შეწყვეტის შესახებ შეთანხმების დარღვევის გამო მძევლების გათავისუფლებას წყვეტს.
