"საქართველო და თავისუფლება არის ის, რის გამოც ღირს ცხოვრებაც და სიკვდილიც", - ამის შესახებ საქართველოს პრეზიდენტმა მიხეილ სააკაშვილმა დღეს საქართველოს ერთიანობისთვის და დამოუკიდებლობისთვის დაღუპულ გმირთა მემორიალის გახსნაზე განაცხადა.
"საქართველო და თავისუფლება ჩვეულებრივი სიტყვები არ არის, ეს არის ის რისთვისაც ღირს ცხოვრება, სუნთქვა, სწვალა, მოღვაწეობა, დაუღალავი შრომა, ახალი რამის შექმნა და ეს არის ის, რისთვისაც სიკვდილი ღირს. ამ მემორიალზე 4000-მდე ჩვენი ბიჭების სახელები წერია. თუმცა აქ არის ძალიან ბევრი ადგილი. ვისურვებდი, რომ ეს ცარიელი ადგილები არასდროს არ შევსებულიყო. ჩვენ გამოცდილი ერი ვართ და ყველანაირად უნდა შევეცადოთ, რომ აქ გვარები აღარ დაემატოს", - განაცხადა პრეზიდენტმა.
მისივე შეფასებით, საქართველომ რომ იარსებოს ყველა მზად უნდა იყოს ფორმა ჩაიცვას და გადამწყვეტ მომენტში იარაღი აიღოს.
"ჩვენ მზად უნდა ვიყოთ ჩვენი სამშობლოს მიწაზე დავეცეთ და ჩვენი გვარები ამ მონუმენტის ცარიელ ნაწილებში დაიწეროს. ეს ჩვენი ქვეყნის გენეტიკური კოდია, ეს არის ჩვენი ისტორიული გამოცდილება, ჩვენი მომავლის მთავარი საწინდარი და გარანტია", - აღნიშნა სააკაშვილმა.
