საქართველოს პრეზიდენტმა მიხეილ სააკაშვილმა ეროვნულ სასკოლო ოლიმპიადაში გამარჯვებული მოსწავლეები დააჯილდოვა.
"ძალიან ვამაყობ იმით, რომ ეს ოლიმპიადები რამდენიმე წლის წინ ჩემი ინიციატივით აღდგა. წელს ოლიმპიადაში მონაწილეთა რეკორდული რაოდენობა დაფიქსირდა და იყო ნაჩვენები ძალიან კარგი შედეგები. საერთო ჯამში, თითქმის 180 ათასმა მოსწავლემ მიიღო მონაწილეობა ამ ოლიმპიადებში", _ განაცხადა სააკაშვილმა მოსწავლებთან შეხვედრისას.
მისი თქმით, საქართველოს მთავარი სტრატეგია არის ახალგაზრდობა. "მთავარი სტრატეგია ჩვენი ქვეყნის ხართ თქვენ, ბავშვები, რომლებიც ქმნიან და შეაქვთ წვლილი ახალი საქართველოს შექმნაში", _ განუცხადა სააკაშვილმა მოსწავლეებს.
საქართველოს პრეზიდენტმა ასევე განაცხადა, რომ წელს საქართველოს 1000 ამერიკელი მასწავლებელი ჩამოჰყავს.
"ყველა დიდ სოფელში ყველა რაიონულ ცენტრში იქნება ამერიკელი სკოლაში, რათა ასწავლოს ინგლისური ენა ქართველ მოსწავლეებს", _ განაცხადა სააკაშვილმა და აღნიშნა, რომ მომავალ წელს საქართველოს 2000 ასეთი მასწავლებელი ეყოლება.
პრეზიდენტმა აღნიშნა, რომ უახლოეს დღეებში საქართველოში ბათუმიდან და ზუგდიდიდან დაიწყება პროგრამა, რომელიც ყველა პირველკლასელისათვის უსასყიდლოდ კომპიუტერის გადაცემას გულისხმობს.
"მინდა იცოდეს ყველა ბავშვმა, ვინც დღეს ამზადებს საშინაო დავალებას და წიგნს უზის _ ისინი ძალიან მნიშვნელოვან საქმეს აკეთებენ ქვეყნის წარმატებისთვის. თქვენი ცოდნა დღეს ფასდება მიღებული ნიშნით და ოლიმპიადაზე მიღწეული შედეგით, ხვალ კი თქვენი ცოდნა შეფასდება ცხოვრებაში მიღწეული წარმატებით", _ განუცხადა სააკაშვილმა მოსწავლეებს.
პრეზიდენტმა ყურადღება გაამახვილა საქართველოში მცხოვრებ ეროვნულ უმცირესობებზე. მისი თქმით, ძალიან მნიშვნელოვანია, რომ საქართველოში მცხოვრები ეთნიკური უმცირესობების წარმომადგენლებს აქვთ გამარტივებულად გამოცდების ჩაბარების საშუალება.
"საქართველო არის მათი ქვეყანა. ისინი მოდიან სხვა ენობრივი ჯგუფიდან და სხვა გარემოდან, მათ ორმაგი დაფასება და სიყვარული სჭირდებათ. საქართველო მხოლოდ ქართველების ქვეყანა არ არის, საქართველო არის ქართველი სომხების, ქართველი აზერბაიჯანელების, ქართველი ოსების, ქართველი აფხაზების, ქართველი ებრაელების ქვეყანა. საქართველო არის ყველა აღმსარებლობის ადამიანის ქვეყანა", _ განაცხადა სააკაშვილმა.
პრეზიდენტმა დღეს დააჯილდოვა მოსწავლეები: სტანისლავ ციბულსკი, ესმა გუმბერიძე, ავთანდილ ნადარეიშვილი, ცოტნე ტაბიძე, ბექა აროშიძე, სვეტლანა კირაკოსიანი, აიზა მამედოვა რაუფ ნახარამოვი.
ბავშვებს ასევე ფულადი პრემიები, კომპიუტერები და დიპლომები გადაეცათ.
