დღეს სასტუმრო "შერატონ მეტეხი პალასში" მოძრაობის "სოლიდარობა უკანონო პატიმრებს" წევრები დიპლომატიური კორპუსის, ევროკავშირის, IRI -ისა და საელჩოს წარმომადგენლებს შეხვდნენ, პოლიტპატიმრების სია გადასცეს და მათი უფლებების დასაცავად სპეციალური კომისიის შექმნა შესთავაზეს.
"კომისიაში იქნებიან უფლებათა დამცველები, იქნებიან ხელისუფლების წარმომადგენლები, ვინც უშუალოდ პასუხისმგებლები არიან ამ პოლიტიკური დევნის შემთხვევაზე, მედიატორის ფუნქციას აიღებს საერთაშორისო საზოგადოება, ევროსაბჭოს, ევროკავშირის წარმომადგენლები და დაიწყება პოლიტიკური ნიშნით დაკავებული პირების საქმეების შესწავლა, იმისთვის, რომ შედეგს მივაღწიოთ," - განაცხადა "სოლიდარობა უკანონო პატიმრების" ლიდერმა ეკა ბესელიამ.
ბესელია იმედოვნებს, რომ საერთაშორისო ორგანიზაციების მხრიდან შედეგი აუცილებლად იქნება და საქართველოში პოლიტიკური ნიშნით ადამიანების დევნა შეწყდება.
