"აბსოლუტურად ლოგიკურია ის შედეგები, რაც NDI-მ დადო. ყველა ამერიკულ კვლევაში, რომელიც საქართველოში ბოლო 20 წლის განმავლობაში ჩატარებულა, პრეზიდენტი და მმართველი კანდიდატი ლიდერობს მათი რეალური რეიტინგის მიუხედავად. შევარდნაძის დროს, შევარდნაძე ლიდერობდა, სააკაშვილის დროს სააკაშვილი და ასე იქნება, ვიდრე ეს ხელისუფლება არ შეიცვლება", - განუცხადა კუკავამ "ჯი-ეიჩ-ენს" აღნიშნულ კვლევაზე კომენტირებისას.

მისივე განმარტებით, "ეროვნული საბჭო", NDI-ის კვლევის შედეგებით არ იხელმძღვანელებს, რადგან მიიჩნევს, რომ ის არაობიექტური და არაკვალიფიციურია.

"კარგად მახსოვს 2008 წლის 5 იანვრის საპრეზიდენტო არჩევნების დროს, როცა ამერიკულმა ორგანიზაციებმა მსგავსი ტიპის კვლევა ჩაატარეს, მიხეილ სააკაშვილს იმაზე მაღალი შედეგები დაუწერეს, ლევან გაჩეჩილაძეს კი იმაზე დაბალი, ვიდრე ცენტრალურმა საარჩევნო კომისიამ, ანუ ამერიკულმა ორგანიზაციებმა ცესკო-ს მაშინდელ ხელმძღვანელ ლევან თარხნიშვილსაც კი გაასწრეს მიკერძოებულობაში",- განმარტავს კუკავა.

რაც შეეხება იმას, რომ ამავე კვლევის მიხედვით, მოსახლეობის 51 % ხელისუფლების საქმიანობას დადებითაც აფასებს, კუკავა მას "არასერიოზულს" უწოდებს.

"ეს არასერიოზულია. მაჩვენოს ვინმემ ეს 51 % ან ავტობუსში, ქუჩაში ან მიტინგზე",- განუცხადა "ეროვნული საბჭოს" ერთ-ერთმა ლიდერმა "ჯი-ეიჩ-ენს".

შეგახსენებთ, რომ ამერიკის ეროვნულ-დემოკრატიული ინსტიტუტის (NDI) მიერ ჩატარებული კვლევის შედეგების მიხედვით, მოსახლეობის 57 % თბილისის მერად მმართველი გუნდის კანდიდატის - გიგი უგულავას გახდომას უჭერს მხარს. მეორე ადგილზეა 7 %-ით "ალიანსის" მერობის კანდიდატი ირაკლი ალასანია, მესამეზე "მრეწველების" ლიდერი გოგი თოფაძე, შემდეგი პოზიცია კი "ქრისტიან-დემოკრატების" კანდიდატ გია ჭანტურიას უჭირავს. "ეროვნული საბჭოს" მერობის კანდიდატი ზვიად ძიძიგური პირველ ხუთეულში საერთოდ ვერ მოხვდა.