მოძრაობა "სამართლიანი საქართველოსთვის" ლიდერი ზურაბ ნოღაიდელი თბილისში დაბრუნდა. როგორც მან აეროპპრტში ჟურნალისტებთან შეხვედრისას განაცხადა, მალე დადგება ის დრო, როცა საქართველოს პრეზიდენტი მიხეილ სააკაშვილი საქართველოს პრეზიდენტი აღარ იქნება და ქართველი ჯარისკაცები 9 მაისს მოსკოვშიც იზეიმებენ.
მისი თქმით, მაშინ როცა სააკაშვილი პრეზიდენტი აღარ იქნება საქართველოს ტერიტორიული მთლიანობის საკითხიც გადაწყდება.
"სააკაშვილი არ იქნება და ქართული ჯარი მიიღებს მონაწილეობას მოსკოვში, წითელ მოედანზე გამართულ აღლუმში. დარწმუნებული ვარ, რომ ეს, ასეც იქნება", - აღნიშნა ნოღაიდელმა.
კითხვაზე თუ რატომ არ იმყოფებოდა ნოღაიდელი ბურჯანაძის მსგავსად აღლუმის დროს წითელ მოედანზე, ექს-პრემიერი აღნიშნავს, რომ აღლუმს ოპოზიციის წარმომადგენლები არ უნდა ესწრებოდნენ.
"დაპატიჟებული ვიყავი ყველა იმ ღონისძიებაზე, რომელიც იქ იყო, მაგრამ რაღაც ღონისძიებებში მონაწილეობა უნდა მივიღო როგორც ოპოზიციის წარმომადგენელმა და რაღაც ღონისძიებებში მას შემდეგ რაც ხელისუფლებაში მოვალთ", - აღნიშნა ნოღაიდელმა.
