ზურაბ ჟვანიას საქმეზე, პრემიერის დაცვის თანამშრომლების კობა ხარშილაძისა და მიხეილ ძაძამიას პროცესზე, დღეს ბრალდების მხარემ სახელმწიფო დაცვის სპეციალური სამსახურის თანამშრომლები, მათ შორის, ყოფილი პრემიერის მძღოლიც დაკითხა.
პროცესის დასრულების შემდეგ პროკურორმა ჟურნალისტებტან განაცხადა, რომ მოწმეებმა ბრალდებულების მიერ კანონის მკაცრი მოთხოვნების დარღვევა დაადასტურეს.
დაცვის მხარის მტკიცებით კი, დღეს დაკითხულმა მოწმეებმა დაადასტურეს, რომ ზურაბ ჟვანია დაცვის მარტო ერთ წევრთან ერთად, კონფიდენციალურ შეხვედრებზე გასვლას, დღეში რამდენჯერმე აწარმოებდა.
ბექა ბესელიას განცხადებით, მოწმეებმა დაადასტურეს, რომ ზურაბ ჟვანიას ჰქონდა თავისი საიდუმლოებები, რომლებსაც დაცვის სხვა წევრებსაც კი არ უმხელდა.
შესაბამისად, ადვოკატი მიიჩნევს, რომ კობა ხარშილაძისა და მიხეილ ძაძამიას ქმედება არა გულგრილობა, არამედ ზურაბ ჟვანიას ერთგულების გამო გადადგმული ნაბიჯია.
„რაც ძალიან მნიშვნელოვანია, დაცვის წევრებმა აღნიშნეს, რომ ზურაბ ჟვანიასთვის კობა ხარშილაძე ათეულობით წლების განმავლობაში იყო უერთგულესი და უახლოესი ადამიანი. მათ აღნიშნეს, რომ ზურაბ ჟვანია იმ საღამოს იყო ძალიან კარგად. ჟვანიას მითითებით წავიდა დაცვის წევრი სხვა მიმართულებით. ყოფილი პრემიერის მითითებით დაცვამ მხოლოდ ერთ წევრთან გააგრძელა გზა.
ასევე, დღეს მოწმეებმა აღნიშნეს, რომ თავი და თავი ყველაფრის დამგეგმავი იმ საღამოს იყო თავად ზურაბ ჟვანია, რომელიც საკუთარი დედის ბინიდან გამოვიდა 11 საათისთვის, თავისი ფეხით ჩაჯდა მანქანაში. თვითონ მოითხოვა იმ მანქანის მიყვანა, უბრძანა სხვა დაცვის წევრებს დაეტოვებინათ და წაიყვანა მხოლოდ ერთმა დაცვის თანამშრომელმა“, -განაცხადა ადვოკატმა.
პროცესი, რომელიც ნაფიცი მსაჯულების პირობებში იმართება, ხვალ 11:00 საათზე, ბრალდების მხარის მოწმეების დაკითხვით გაგრძელდება.
