მიუხედავად იმისა, რომ დასავლელი დიპლომატები საჯაროდ აცხადებენ, რომ კიევში დარჩენას აპირებენ, ისინი საგანგებო ვითარებისთვის საელჩოების გადატანის გეგმებსაც ამზადებენ. ამის შესახებ The Guardian წერს.
გამოცემის ცნობით, დასავლელი დიპლომატები აცნობიერებენ, რომ კიევიდან მათი გამგზავრება მოსკოვისთვის პროპაგანდისტულ გამარჯვებად შეიძლება იქცეს და შექმნას შთაბეჭდილება, თითქოს დასავლეთმა უკრაინა მიატოვა.
თუმცა, ორი გავლენიანი დიპლომატის ინფორმაციით, პირად საუბრებში განიხილება საელჩოების ლვოვში ან პოლონეთის აღმოსავლეთ ნაწილში გადატანის გეგმა იმ შემთხვევაში, თუ რუსეთი უცხო ქვეყნების დიპლომატიურ წარმომადგენლობებზე მიზანმიმართულ თავდასხმებს დაიწყებს.
„ვითარება, აშკარად, სწრაფად უარესდება“, - განაცხადა ერთ-ერთმა დიპლომატმა.
The Guardian-ის ინფორმაციით, დასავლელი ქვეყნების წარმომადგენლები ამ ეტაპზე კიევში მუშაობის გაგრძელებას გეგმავენ, თუმცა რუსეთის მიერ თავდასხმების გაძლიერების შემთხვევაში შესაძლო საგანგებო სცენარებისთვის მზადება მიმდინარეობს.
როგორც ცნობილია, უკრაინის პრეზიდენტი ვოლოდიმირ ზელენსკი აცხადებს, რომ რუსეთი აშშ-ის შუალედური არჩევნების წინ ომის ესკალაციას გააძლიერებს.
