"თუ ხელისუფლება შევადნაძისდროინდელ შეცდომებს გაიმეორეს, არჩევნებს გააყალბებს და მოსახლეობას თვალში ნაცარს შეაყრის, ქვეყანაში მოვლენები რევოლუციური სცენარით განვითარდება", - ამის შესახებ რუსეთიდან დაბრუნებულმა, "ეროვნული საბჭოს" ერთ-ერთმა ლიდერმა კობა დავითაშვილმა დღეს, "პრაიმ-ტაიმის" პრესკლუბში, ჟურნალისტებთან შეხვედრისას განაცხადა.
"რევოლუციური სიტუაცია ქვეყანაში სწორედ მაშინ შეიქმნება, როდესაც ხელისუფლება არჩევნების დღეს ნაცად ფორმას მიმართავს, საარჩევნო უბნებზე დაიწყებს ელექტროენერგიის გათიშვას, ოქმების გადაწერას და ქმედებებს, რომელსაც აუცილებლად მოჰყვება საზოგადოებრივი პროტესტი და მღელვარება. თუკი მაისის არჩევნები ხელისუფლების მხრიდან შემოთავაზებული სცენარი სწორედ ამ ფორმით იქნება, გარწმუნებთ, რომ სააკაშვილი თავად მოაწერს ხელს რევოლუციის სცენარს. ის, თუ როგორ ხდება ქვეყანაში რევოლუციები, ეს ჩემზე კარგად არავინ იცის, რადგანაც 2003 წელს, ფაქტობრივად, რევოლუცია ჩვენი დაგეგმილი იყო", - განაცხადა დავითაშვილმა.
ამასთან, მისი განმარტებით, თუკი მაისის არჩევნები "ოდნავ მაინც იქნება სამართლიანობასთან მიახლოებული, "ეროვნული საბჭო" მის შედეგებს მართლზომიერად მიიჩნევს".