გადაუღებელმა წვიმამ კულტურული ძეგლიც დააზიანა. მცხეთაში ბებრისციხის ერთი კედელი ჩამოინგრა. როგორც "ჯი-ეიჩ-ენს" კულტურული მემკვიდრეობის დეპარტამენტის მონიტორინგის ხელმძღვანელმა ნიკა ანთიძემ განუცხადა, მეწყერის შედეგად ჩამოშლილია ძეგლის ჩრდილო-აღმოსავლეთ ნაწილი.
"მეწყერის ჩამოწოლის შედეგად ჩამოინგრა ბებრისციხის ჩრდილო-აღმოსავლეთით, კედლის საკმაოდ დიდი ნაწილი. ახლა კულტურული მემკვიდრეობის სააგენტოს ჯგუფთან ერთად ადგილზე ვიმყოფები და ზუსტად ვსწავლობთ, ძეგლის რა ნაწილია დანგრეული და რა ნაწილობრივ დაზიანებული", - განუცხადა "ჯი-ეიჩ-ენს" ანთიძემ.
მისივე ინფორმაციით, სტიქიის შედეგად სხვა კულტურული ძეგლების დაზიანების შესახებ შესაბამის უწყებაში ინფორმაცია ამ ეტაპზე არ შესულა.
შეგახსენებთ, რომ ბებრისციხე, ადრინდელი შუა საუკუნეების ციხესიმაგრეა, რომელიც ქართლში, მცხეთის ჩრდილოეთით მდებარეობს. მას უძველეს დროს ბელტა ერქვა. იგი ანტიკურ ხანაშია აგებული. ციხე-სიმაგრის საერთო ფართი დაახლოებით 1500 კვ.მ-ია, შიდა ეზოსი კი 600 კვ-მეტრი.
