ექსპერტი გია ხუხაშვილი, მსოფლიო სავაჭრო ორგანიზაციისა და ევროკავშირის მოთხოვნას, ერთიან საგადასახადო განაკვეთის ამოქმედებაზე, დაცინვად მიიჩნევს.
"საქართველო ძირითადად ყველას ჭირდება იმისთვის, რომ გაასაღონ თავისი პროდუქცია. ეხლაც მსგავსი სიტუაციაა, არავინ ფიქრობს, რომ საქართველოში ბიზნესი გასავითარებელია. ერთიანი საგადასახადო განაკვეთი საბოლოოდ დაანგრევს ისედაც განუვითარებელ ეკონომიკას", _ განაცხადა "ჯი-ეიჩ-ენთან" საუბარში ხუხაშვილმა.
მისივე განცხადებით, საქართველოში თავიდანვე არასწორი ეკონომიკური პოლიტიკა იყო განვითარებული, რამაც მსგავსი სიტუაციების შექმნა გამოიწვია. საგადასახადო განაკვეთის გათანაბრება საბოლოო ლურსმნის ჩაჭედებაა საქართველოს ეკონომიკისთვის.
"უნდა მოხდეს არა გათანაბრება, არამედ დაბალანსება ისე, რომ ადგილობრივ მეწარმებს შეეძლოთ ბიზნესის განვითარება. რაც შეეხება მოსაზრებას, რომ სხვადასხვა იმპორტის არსებობა საქართველოს მხრიდან იმპორტირებული პროდუქციის დისკრიმინაციად ითვლება ცინიკურად ჟღერს მაშინ, როცა საქართველოში იმპორტირებული პროდუქცია 90%-ს შეადგენს", _ აცხადებს"ჯი-ეიჩ-ენთან" საუბარში ხუხაშვილი.
შეგახსენებთ, მსოფლიო სავაჭრო ორგანიზაცია და ევროკავშირი საქართველოს მთავრობას სთხოვენ, იმპორტიორებისა და ადგილობრივი მწარმოებლებისათვის ერთიანი საგადასახადო განაკვეთი აამოქმედოს. სხვადასხვა რეჟიმის არსებობას ისინი იმპორტირებული პროდუქციის დისკრიმინაციად აფასებენ. სააქციზო გადასახადი იმპორტირებულ თამბაქოს პროდუქციაზე 60 თეთრს, ადგილობრივ ნაწარმზე კი 40 თეთრს შეადგენს.
