სოფლის მეურნეობის დარგში დაკავებული ფერმერები სასოფლო-სამეურნეო ტექნიკის დღგ-ს გადასახადისგან განთავისუფლებას ან მის შემცირებას ითხოვენ. როგორც საქართველოს მეცხვარეთა ასოციაციის ხელმძღვანელი განმარტავს, თუ კი ხელისუფლება დათმობაზე წავა და სასოფლო-სამეურნეო ტექნიკის იმპორტს დღგ-სგან გაათავისუფლებს, ტექნიკა ადგილზე იაფი იქნება და იმავდროულად მასზე ხელმისაწვდომობაც გაიზრდება.
„ეს თემა პირდაპირ მეცხვარეობის განვითარებას არ ეხება, მაგრამ ირიბად ეხება. თუმცა გეტყვით, რომ სასოფლო-სამეურნეო ტექნიკა, რომელიც საქართველოში შემოდის ჩვეულ რეჟიმში იბეგრება. ანუ იბეგრება საბაჟო და დღგ-ს გადასახადებით. ანუ თქვენ, რომ საქართველოში 10 ათას დოლარიანი ტრაქტორი იყიდოთ, თქვენ 3200 დოლარი უკვე ამ გადასახადებში გაქვთ გადახდილი. ჩვენი აზრი უბრალოდ არის ასეთი, რომ ქვეყანაში სადაც არანაირი ჭანჭიკიც არ იწარმოება, რა საჭიროა ასეთი გადასახადი? ამით ჩვენ ხომ ადგილობრივ წარმოებას არ ვიცავთ? ამით მხოლოდ ბიუჯეტს ვავსებთ და მხოლოდ ბიუჯეტის შესავსებად არც იმდენი სასოფლო-სამეურნეო ტექნიკის იმპორტი არ ხდება ქვეყანაში, რომ ამ ყველაფერმა ბიუჯეტს პირდაპირ დაარტყას. ამიტომ ჩვენი სურვილია, რომ სასოფლო-სამეურნეო ტექნიკა ამ გადასახედბისგან განთავისუფლდეს, ან ამ გადასახედებმა დაიწიოს. ამით საშუალება გვექნება იმისა, რომ ფერმერებმა თვითონ გამოცვალონ და შეიძინონ ახალი ტექნიკა. ანუ ამის საშუალება თავად გაუჩნდებათ. ეს ყველაფერი კი ცხადია ტექნიკაზე ხელმისაწვდომობას გაზრდის და შესაბამისად პროდუქციის წარმოებაც უფრო იაფი დაჯდება. შეგვეძლება ასევე კონკურენცია გავუწიოთ სხვა ბაზრებს. ჩვენ დღეს კონკურენცია როგორ უნდა გავუწიოთ ვთქვათ აზერბაიჯანს, რომელსაც დიზელი აქვს კაპიკებში და ჩვენ კიდე 2 ლარს ვიხდით. ჩვენ ხომ შეგვიძლია სხვა რაღაცაში დავზოგოთ ჩვენი ხარჯები და სხვა მიმართულებით გავხადოთ ჩვენი წარმოება ეფექტური"- განმარტავს გონაშვილი.
