რასაც რეჟიმი აკეთებს, მხოლოდ იმის დასტურია, რომ ჩვენი ოდნავ უკეთესი ორგანიზაციის პირობებში, უბრალოდ მარტივ მამრავლებად დაიშლებიან, - ამის შესახებ სოციალურ ქსელში პარტია "ფედერალისტების" ლიდერი თამარ ჩერგოლეიშვილი წერს.
ჩერგოლეიშვილი ოპოზიციონერი პოლიტიკოსების მიმართ სისხლის სამართლებრივი დევნის დაწყებას ეხმიანება.
"რასაც რეჟიმი აკეთებს, მხოლოდ იმის დასტურია, რომ ჩვენი ოდნავ უკეთესი ორგანიზაციის პირობებში, უბრალოდ მარტივ მამრავლებად დაიშლებიან.
და უკეთეს ორგანიზაციასაც ვერ ავცდებით - გარდაუვალია.
მოკლედ, მტკიცედ, მშვიდად, ბოლომდე!" - წერს ჩერგოლეიშვილი.
შეგახსენებთ, დღეს, მთვარი პროკურორის ბრიფინგზე ცნობილი გახდა, რომ პროკურატურამ მიხეილ სააკაშვილის, გიორგი ვაშაძის, ნიკა გვარამიას, ნიკანორ მელიას, ზურაბ გირჩი ჯაფარიძის, ელენე ხოშტარიას, მამუკა ხაზარაძის და ბადრი ჯაფარიძის მიმართ სისხლისსამართლებრივი დევნა დაიწყო.
გიორგი გვარაკიძის ცნობით, მიხეილ სააკაშვილს ბრალდება წარედგინება საქართველოს სისხლის სამართლის კოდექსის 317-ე მუხლით - საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდების ფაქტზე. ზურაბ გირჩი ჯაფარიძეს და გიორგი ვაშაძეს ბრალდება წარედგინებათ საქართველოს სისხლის სამართლის კოდექსის 318-ე მუხლის პირველი ნაწილით და 319-ე მუხლით - საბოტაჟის და უცხო ქვეყნისათვის მტრულ საქმიანობაში დახმარების ფაქტზე. ელენე ხოშტარიას ბრალდება წარედგინება საქართველოს სისხლის სამართლის კოდექსის 318-ე მუხლის პირველი ნაწილით, 319-ე მუხლით და 321-ე პრიმა მუხლის პირველი ნაწილით - საბოტაჟის, აღნიშნული დანაშაულისთვის მატერიალური რესურსების მიწოდების და უცხო ქვეყნისათვის მტრულ საქმიანობაში დახმარების ფაქტზე. ნიკა გვარამიას, ნიკანორ მელიას, მამუკა ხაზარაძეს და ბადრი ჯაფარიძეს ბრალდება წარედგინებათ საქართველოს სისხლის სამართლის კოდექსის 318-ე მუხლის პირველი ნაწილით - საბოტაჟის ფაქტზე.
პროკურატურა აღკვეთის ღონისძიების სახით მამუკა ხაზარაძის და ბადრი ჯაფარიძის მიმართ - გირაოს, ხოლო სხვა ბრალდებულების მიმართ წინასასამართლო სხდომის თარიღის განსაზღვრის მოთხოვნით სასამართლოს კანონით დადგენილ ვადაში მიმართავს.
