ვხედავთ პროკურატურის აბსურდს, პირდაპირ ზღაპარს, ბრალდების ყველა სიტყვა, რომელიც მოვისმინეთ, არის უსაფუძვლო, სიცრუე და თითიდან გამოწოვილი ტყუილი, – ამის შესახებ „ლელო – ძლიერი საქართველოს“ წევრმა, თაზო დათუნაშვილმა ბრიფინგზე განაცხადა.
მისი თქმით, ეს არის მიზანმიმართული პოლიტიკური დევნა პარტიის ლიდერების წინააღმდეგ.
„მცდელობაა, რომ მთლიანად გააქრონ პოლიტიკური სპექტრი და სრულად მოკლან ქვეყანაში პოლიტიკური პროცესი. ჩვენ ვხედავთ პროკურატურის აბსურდს, ზღაპარს. ბრალდების ყველა სიტყვა, რომელიც მოვისმინეთ, არის უსაფუძვლო, სიცრუე და თითიდან გამოწოვილი სრული ტყუილი. ეს არის მიზანმიმართული პოლიტიკური დევნა ჩვენი პარტიის ლიდერების წინააღმდეგ. ეს არის დანაშაული, რომელსაც რეჟიმი პოლიტიკური ოპონენტების წინააღმდეგ ახორციელებს. ივანიშვილი ამოცანაა, კიდევ ერთხელ ციხეში ჩასვას მამუკა ხაზარაძე და ბადრი ჯაფარიძე და ამით გაანეიტრალოს ჩვენი ბრძოლა, რომელშიც ვართ ჩართული რეჟიმის წინააღმდეგ. რუსულმა ოცნებამ პოლიტიკური პროცესის მოსპობა ვერაფრით ვერ მოახერხა, სავარაუდოდ, არც იმ აბსურდის სჯერათ, რასაც ჰქვია პარტიების გაუქმების პროცედურა და გადაწყვიტა, დაატუსაღოს და ციხეში ჩასვას მთლიანად პოლიტიკა. ვერცერთი ბრალდება ვერ გააჩერებს ჩვენს პოლიტიკურ და სამართლებრივ წინააღმდეგობას ამ რუსული რეჟიმის წინააღმდეგ. ეს ბრძოლა საქართველოსთვის და ქართველი ხალხისთვის აუცილებლად გამარჯვებით დასრულდება. „ლელო – ძლიერი საქართველო“ იბრძოდა და გააგრძელებს ბრძოლას ყველა კონსტიტუციური, სამართლებრივი და პოლიტიკური გზით, რომ რუსული 200-წლიანი ბატონობა ერთხელ და სამუდამოდ დასრულდეს ამ ქვეყანაში“, – განაცხადა თაზო დათუნაშვილმა.
დღეს, მთვარი პროკურორის ბრიფინგზე ცნობილი გახდა, რომ პროკურატურამ მიხეილ სააკაშვილის, გიორგი ვაშაძის, ნიკა გვარამიას, ნიკანორ მელიას, ზურაბ გირჩი ჯაფარიძის, ელენე ხოშტარიას, მამუკა ხაზარაძის და ბადრი ჯაფარიძის მიმართ სისხლისსამართლებრივი დევნა დაიწყო.
გიორგი გვარაკიძის ცნობით, მიხეილ სააკაშვილს ბრალდება წარედგინება საქართველოს სისხლის სამართლის კოდექსის 317-ე მუხლით - საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდების ფაქტზე. ზურაბ გირჩი ჯაფარიძეს და გიორგი ვაშაძეს ბრალდება წარედგინებათ საქართველოს სისხლის სამართლის კოდექსის 318-ე მუხლის პირველი ნაწილით და 319-ე მუხლით - საბოტაჟის და უცხო ქვეყნისათვის მტრულ საქმიანობაში დახმარების ფაქტზე. ელენე ხოშტარიას ბრალდება წარედგინება საქართველოს სისხლის სამართლის კოდექსის 318-ე მუხლის პირველი ნაწილით, 319-ე მუხლით და 321-ე პრიმა მუხლის პირველი ნაწილით - საბოტაჟის, აღნიშნული დანაშაულისთვის მატერიალური რესურსების მიწოდების და უცხო ქვეყნისათვის მტრულ საქმიანობაში დახმარების ფაქტზე. ნიკა გვარამიას, ნიკანორ მელიას, მამუკა ხაზარაძეს და ბადრი ჯაფარიძეს ბრალდება წარედგინებათ საქართველოს სისხლის სამართლის კოდექსის 318-ე მუხლის პირველი ნაწილით - საბოტაჟის ფაქტზე.
პროკურატურა აღკვეთის ღონისძიების სახით მამუკა ხაზარაძის და ბადრი ჯაფარიძის მიმართ - გირაოს, ხოლო სხვა ბრალდებულების მიმართ წინასასამართლო სხდომის თარიღის განსაზღვრის მოთხოვნით სასამართლოს კანონით დადგენილ ვადაში მიმართავს.
