საგარეო საქმეთა მინისტრის მოადგილის დავით ზალკალიანის განაცხადებით, ევროკავშირის მისიის ხელმძღვანელის მოადგილედ რაიან გრისტის დანიშვნა საგარეო უწყებასთან შეთანხმებული არ ყოფილა. როგორც საკითხის კომენტირებისას ზალკალიანმა განაცხადა აღნიშნულ საკითხხზე კონსულტაციები ევროკავშირის წარმომადგენლებთან მიმდინარეობს და საბოლოოდ ისეთი გადაწყვეტილება იქნება მიღებული, რომელიც საქართველოს ინტერესებს არ დააზარალებს.
,,რაიან გრისტის დანიშვნა საგარეო საქმეთა სამინისტროსთან შეთანხმებული არ ყოფილა და ჩვენ არანაირი ზემოქმედების ბერკეტი არ გაგვაჩნდა, რომ ამ გადაწყვეტილების მიღების პროცესში მონაწილეობა მიგვეღო. არასამართლიანია როდესაც საგარეო საქმეთა სამინისტროს დადანაშაულება ხდება. მოლაპარაკებები მიმდინარეობს ევროკავშირთან და ისე გადავწყვეტთ ამ საკითხს რომ, ეს მისაღები იყოს როგორც საქართველოსთვის, ასევე ევროკავშირისთვის და არ დავაზარალოთ ჩვენი ქვეყნის ინტერესები", _განაცხადა ზალკალიანმა.
შეგახსენებთ, რომ ,,ნაცმოძრაობა" საქართველოში ევროკავშირის სადამკვირვებლო მისიის ხელმძღვანელის მოადგილის თანამდებობაზე რაიან გრისტის დანიშვნას აპროტესტებს. ,,ნაცმოძრაობის" წევრმა ზურაბ ჯაფარიძემ ხელისუფლებას მოუწოდა გამოყენოს ყველა ბერკეტი იმისთვის რომ გრისტმა დატოვოს არა მხოლოდ ევროკავშირის სადამკვირვებლო მისია, არამედ საქართველო.
,,ამ ადამიანის რეპუტაცია ცნობილია როგორც ქვეყნის შიგნით ისე ქვეყნის გარეთ, ვინც თვალყურს ადევნებდა 2008 წლის აგვისტოში რუსეთის მიერ საქართველოს წინააღმდეგ განხორციელებულ სამხედრო აგრესიას. გრისტი მაშინ იკავებდა საქართველოში ეუთოს მისიის საკმაოდ მაღალ თანამდებობას და იგი ომის დღეებშივე იქცა მთავარ ინსტრუმენტად რუსეთის მიერ წარმოებულ პროპაგანდისტულ საინფორმაციო ომში. იგი ომის დამთავრების შემდეგ ეუთოს მისიის მოთხოვნით გაყვანილ იქნა საქართველოსგან. ჩვენ ვთვლით, რომ ევროკავშირის სადამკვირვებლო მისია არის საკმაოდ მნიშვნელოვანი ინსტრუმენტი რომელიც ჩვენი ქვეყნის ხელში დღეს არსებობს და ის დიდ როლს ასრულებს საქართველოს ეროვნული უსაფრთხოების საქმეში.ამავე დროს, მოუწოდებთ საქართველოს მთავარობას გამოიყენოს ყველა ის ბერკეტი რათა გრისტმა დატოვოს არა მხოლოდ ევროკავშირის სადამკვირვებლო მისია, არამედ საქართველო", _განაცხადა ჯაფარიძემ.
