დედაქალაქის უფლებაშეჩერებული მერის გიგი უგულავას განცხადებით, პრემიერ-მინისტრი ირაკლი ღარიბაშვილი პირადადაა ჩართული ვანო მერაბიშვილის წინააღმდეგ ახალი ბრალის "შეთითხვნა"-ში.
მისი თქმით, საქმე "მუხროვანის ამბოხთან" დაკავშირებულ სპეცოპერაციას ეხება.
"უახლოესი ერთი კვირის განმავლობაში სასამართლომ უნდა გამოიტოს საბოლოო განაჩენი ვანო მერაბიშვილისა და ზურაბ ჭიაბერაშვილის საქმეზე. როგორც ჩანს, მთავრობა ნერვიულობს, ამიტომ დაიწყეს ახალი ბრალის შეთითხვნა, რომელშიც პირადადაა ჩართული ირაკი ღარიბაშვილი", - განაცხადა გიგი უგულავამ ტელეკომტანია „იმედის" გადაცემა „რეაქციაში".
უგულავამ აღნიშნა, რომ საქმე ეხება გლდანში ჩატარებულ სპეცოპერაციას, რომლის შედეგადაც ერთი ადამიანი დაიღუპა, მეორე კი დაიჭრა.
„ასფალტიც კი გათხარეს და ეძებენ "გილზებს". შეკვეთა აქვთ მიცემული გამომძიებლებისთვის, რომ გივი თარგამაძე გაასაღონ როგორც ადამიანი, რომელმაც ოთანაძეს დაუშინა ტყვიები. მინდა სრული პასუხისმგებლობით განვაცხადო, რომ თარგამაძეს არა თუ იარაღი არ ჭერია, მან გადაარჩინა დაჭრილი, ბოლომდე მიჰყვა მათ საავადმყოფოში", - განაცხადა გიგი უგულავამ.
უგულავამ ინგა იგრიგოლიას საავტორო გადაცემა „რეაქციაში" აღნიშნა, რომ იმ მომენტში ადგილზე თავადაც იმყოფებოდა და სიმართლის მოსასმენად პროკურატურას შეუძლია დაკითხვაზე ისიც დაიბაროს.
"როგოც ჩანს, ხელისუფლებას გადაწყვეტილი აქვს ხელახლა შეთითხნოს საქმე და მთელი წინასაარჩევნო პერიოდი ამ სიბინძურით გაატაროს. მაგრამ მინდა ვუთხრა მას, რომ ეს არ გამოუვა და ისევე, როგორც ბევრი სხვა საქმე, ესეც საპნის ბუშტივით გაუსკდება", - განაცხადა გიგი უგულავამ.
