არასამთავრობო ორგანიზაციის „ადამიანი, კანონი, თავისუფლებას" თავმჯდომარე, გიორგი ჭულუხაძე და აღმასრულებელი დირექტორი, ნიკოლოზ მაღალდაძე, შიდა ქართლის გუბერნატორს, ზურაბ რუსიშვილს შეხვდნენ. შეხვედრაზე განხილულ იქნა სამომავლო პროექტები, რომლის განხორციელებასაც გორის მუნიციპალიტეტი აპირებს. ასევე, საუბარი შეეხო იმ პრობლემებს, რომლიც არსებობს რეგიონში და მოგვარება წლების განმავლობაში ვერ ხერხდებოდა.
როგორც ორგანიზაციისათვის გახდა ცნობილი ახალი გუბერნატორის მოსვლის შემდეგ გუბერნიაში შიდა რეორგანიზაცია განხორციელდა რომელიც 29 იანვარს დასრულდა, როგორც გუბერნატორმა აღნიშნა იმისათვის რომ გუბერნატორის მოსახლეობასთან შეხვედრა იყოს პროდუქტიული და ქმედითუნარიანი აუცილებელია ორგანიზაციული სამსახურის გამართვა.
ზურაბ რუსიშვილის განცხადებით რეგიონის მთავარ პრობლემას უმუშევრობა და სოციალურ-ეკონომიური მდგომარეობა წარმოადგენს. მისი თქმით რეგიონის მთავარ პრიორიტეტს სწორედ მოსახლეობის დასაქმება და კონფლიქტის ზონასა და დევნილთა ჩასახლებებში სოციალური დახმარების გაწევაა. გუბერნატორი მიიჩნევს, რომ უპრიანია არსებულის შენარჩუნება და განვითარება, ამიტომაც დაგეგმილია სოფლისმეურნეობის განვითარების კუთხით არაერთი პროექტის შემუშავება და განხორციელება.
აღსანიშნავია რომ, გუბერნატორი სისტემატიურად ადმინისტრაციაში მოსახლეობასთან შეხვედრას მართავს, რომლის ფარგლებშიც იგი ეცნობა რეგიონში არსებულ ვითარებასა და პრობლემურ საკითხებს. ზურაბ რუსიშვილი გუბერნატორის თანამდებობაზე დანიშვნის შემდეგ უკვე შეხვდა ადგილობრივ არასამთავრობო ორგანიზაციებს და მათთან თანამშრომლობის სურვილი გამოთქვა. გუბერნატორმა ასევე ე.წ. საზღვრისპირა სოფლების მოსახლეობა მოინახულა და ადგილზე გაეცნო მათ საჭიროებებს. ერთ-ერთ მთვარ პრიორიტეტს წარმოადგენს რეგიონის რწმუნებულებთან აქტიური შეხვედრები, რაც მიზნად ისახავს რწმუნებულების ინსტიტუტის ფუნქციონალურ განვითარებას.
„თვითმმართველობის ახალი კოდექსის შესაბამისად გორი მზად არის გახდეს თვითმმართველი ქალაქი, თუმცა სამომავლოდ გორის, როგორც თვითმმართველი ქალაქის მართვაში აუცილებელია სწორი მენეჯმენტის გატარება. ჩვენთვის მთავარია თვითმმათველი ორგანოების გახდნენ უფრო ეფექტიანები, რათა მოხდეს მოსახლეობის მოთხოვნების დროული გათვალისწინება და დაკმაყოფილება" - აცხადებს რუსიშვილი
ბატონმა ზურაბმა გამოთქვა სურვილი ადგილობრივი ახალგაზრდების ჩართულობა ყოველდღიურ ცხოვრებაში იყოს აქტიური. მისი განმარტებით საზოგადოებას დაგეგმილი თვითმმართველობის რეფორმის ფარგლებში ესაჭიროება ამომწურავი ინფორმაციის მიწოდება. სასურველია მოხდეს ახალგაზრდების დატრენინგება, რათა გააქტიურდნენ და ჩამოყალიბდნენ აქტიურ მოქალქეებად.
„ჩვენ გამოვხატეთ თანამშრომლობის სურვილი, რასაც ანალოგიური პასუხი მოჰყვა გუბერნატორის მხრიდან. მივაწოდეთ ინფორმაცია, რომ დაინტერესებულნი ვართ როგორც გუბერნატორის ადმინისტრაციის, ასევე თვითმმართველობის ბიუჯეტების ხარჯვის მონიტორინგით. ჩავაყენეთ საქმის კურსში, რომ ახლო მომავალში საზოგადოებას წარუდგენთ ბოლო 3 წლის მანძილზე გუბერნატორის ადმინისტრაციის ხარჯების ანალიზს. ამ კუთხით გამოითქვა აბსოლუტური მზაობა და მხარეები შევთანხმდით, რომ ზემოაღნიშნული ინფორმაცია ხელმისაწვდომი იქნება" - აცხადებს არასამთავრობო ორგანიზაციის თავმჯდომარე, გიორგი ჭულუხაძე.
არასამთავრობო ორგანიზაცია „ადამიანი, კანონი, თავისუფლება" და შიდა ქართლის გუბერნატორის ადმინისტრაცია სამომავლოდ ურთიერთთანამშრომლობის ფორმატის გაღრმავებაზე შეთანხმდნენ.
