სახალხო დამცველი უჩა ნანუაშვილი მთავარობის ადამიანის უფლებათა დაცვის სტრატეგიასა და სამოქმედო გეგმებთან დაკავშირებით შენიშვნებს აქვეყნებს და ხელისუფლებას მოუწოდებს სამოქმედო გეგმების დამტკიცება გადაავადოს. ,,ჯი-ეიჩ-ენი" ნანუაშვილის განცხადებას უცვლელად გთავაზობთ:საქართველოს სახალხო დამცველი კიდევ ერთხელ მიესალმება საქართველოს მთავრობის მტკიცე გადაწყვეტილებას, შეიქმნას ადამიანის უფლებათა დაცვის ეროვნული სტრატეგია და სამოქმედო გეგმა.
2013 წლის 5 ივლისის საქართველოს მთავრობის #169 დადგენილების თანახმად, საქართველოს სახალხო დამცველი წარმოადგენს ადამიანის უფლებათა დაცვის სტრატეგიისა და სამოქმედო გეგმის შემმუშავებელი უწყებათაშორისი საბჭოს წევრს.
დასაწყისშივე უნდა აღინიშნოს, რომ სტრატეგიის შემუშავების პროცესი ტოვებდა უფრო მეტი ჩართულობის და გახსნილობის სურვილს. მთავარი მოლოდინი, რაც სტრატეგიის შემმუშავებელი უწყებათაშორისი საბჭოს მიმართ არსებობდა იყო ის, რომ მას თავი უნდა მოეყარა ქვეყანაში ადამიანის უფლებათა სფეროში არსებული პრობლემებისთვის, მოეხდინა ექპერტიზისა და დაგროვილი გამოცდილების იდენტიფიცირება და დაესახა ამ პრობლემათა გადაწყვეტის საუკეთესო გზები.
პროცესის მიმდინარეობისას ადგილი ჰქონდა რამდენიმე შეხვედრას სხვადასხვა სამიზნე ჯგუფების წარმომადგენლებთან, რაც უდავოდ მისასალმებელია, თუმცა პროცესის რეალური თანამონაწილეობისთვის, უმჯობესი იქნებოდა, საქართველოს სახალხო დამცველს, ისევე როგორც ქვეყანაში მოქმედ ცენტრალურ თუ რეგიონულ არასამთავრობო ორგანიზაციების უფრო ფართო სპექტრს, მისცემოდა საბჭოს სამდივნოს ფარგლებში მომზადებული სამუშაო დოკუმენტების შემუშავებაში მონაწილეობის მიღების შესაძლებლობა; ან, როგორც მინიმუმ, სამუშაო დოკუმენტების უფრო ადრეულ ეტაპზე გაცნობის საშუალება.
მიუხედავად ზემოაღნიშნულისა, სახალხო დამცველი მოხარულია, რომ მოცემულ ეტაპზე, სხვა დაინტერესებულ მხარეებთან ერთად, აქვს შესაძლებლობა სტრატეგიისა და სამოქმედო გეგმების სამუშაო დოკუმენტებთან დაკავშირებით დაინტერესებულ საზოგადოებას საკუთარი შენიშვნები წარუდგინოს.
განსახილველად წარმოდგენილი ადამიანის უფლებათა დაცვის ეროვნული სტრატეგია გვთავაზობს კარგად ჩამოყალიბებულ პრინციპებს და მეტ-ნაკლებად გამოკვეთს სტრატეგიის შესრულების მონიტორინგის მექანიზმს, თუმცა, დოკუმენტი კვლავ საჭიროებს მნიშვნელოვან გაუმჯობესებას. კიდევ უფრო მეტი კითხვები ჩნდება საბჭოს სამდივნოს მიერ წარმოდგენილ სამოქმედო გეგმებთან დაკავშირებით, რომლებიც ხშირ შემთხვევაში სრულად ან მცირედი ცვლილებებით იმეორებს სხვადასხვა სფეროში უკვე არსებულ სამოქმედო გეგმებს და გადაფარვის სერიოზულ საფრთხეს ქმნის.
ადამიანის უფლებათა სტრატეგიისა და სამოქმედო გეგმების განსაკუთრებული მნიშვნელობის გათვალისწინებით, სახალხო დამცველი მოუწოდებს საქართველოს მთავრობას და უწყებათაშორის საბჭოს, სტრატეგიის და სამოქმედო გეგმების დამტკიცება იმ დროით გადაავადოს, რაც დაინტერესებულ მხარეებს მისცემს გონივრული შესაძლებლობას, ჩაერთონ დოკუმენტების შემუშავების და დახვეწის პროცესში. წინააღმდეგ შემთხვევაში, არსებობს საფრთხე, რომ სტრატეგია და სამოქმედო გეგმა, იქნება საერთაშორისო დონეზე საქართველოს ინტერესების დაწინაურებისთვის მიღებული მორიგი აქტი, რომელიც ქვეყნის შიგნით მხოლოდ ზედაპირულ-ფორმალური ღონისძიებების გატარებით შემოიფარგლება და არა საშუალება, რომელიც მიმართული იქნება კონკრეტულ ვადებში ადამიანის უფლებათა სფეროში არსებული მწვავე პრობლემების გადაწყვეტისკენ", _ნათქვამია განაცხადებაში.
