"პროკრედიტ ბანკმა" ბათუმში ფუნქციონირება მისი საქართველოში მოღვაწეობის თითქმის დასაწყისიდანვე დაიწყო და დღეის მდგომარეობით მისი 5 ფილიალი 25 000-ზე მეტ კლიენტს ემსახურება.
ამჯერად "პროკრედიტ ბანკის" ბათუმის ფილიალი ახალ შენობაში გადავიდა. თანამედროვე დიზაინითა და მაღალი სტანდარტებით მოწყობილი 3-სართულიანი, 1000 კვ.მ ფართის ენერგოეფექტური შენობა კლიენტების მომსახურების სრულფასოვან შესაძლებლობას იძლევა.
ბანკმა შენობა ორი წლის წინ შეიძინა და ჯამში 5 მილიონ ლარამდე ინვესტიცია განახორციელა, რაც მის გრძელვადიან მიზნებზე კვლავაც ნათლად მეტყველებს. გამომდინარე იქიდან, რომ შენობა ისტორიულ ძეგლს წარმოადგენს, გამაგრებითი და სარემონტო სამუშაოების ყველა ეტაპი, კულტურული მემკვიდრეობისა და ბათუმის მერიის არქიტექტურის სამსახურთან შეთანხმებით, დიდი სიფრთხილითა და პასუხისმგებლობით მიმდინარეობდა.
შეძენის მომენტში შენობა სავალალო მდგომარეობაში იყო. მოწვეული ექსპერტების გამოკვლევის შედეგად დადგინდა, რომ კონსტრუქცია საკმაოდ დაზიანებული იყო. სარემონტო-სარეაბილიტაციო სამუშაოების შესრულებას გერმანელი არქიტექტორი ჩაუდგა სათავეში. ყველაზე დიდი რესურსი სწორედ ნაგებობის გამაგრებით სამუშაოებზე დაიხარჯა. შენობა მაღალი ხარისხის მასალების გამოყენებით გარემონტდა და რაც მთავარია შენარჩუნდა მისი ძველი იერსახე, რაც ბათუმის მოსახლეობისა და შესაბამისად ბანკისათვის საკმაოდ მნიშვნელოვანი იყო.
ბანკის ახალი კონცეფციის მიხედვით დაგეგმილი სივრცე, სადაც 60-მდე თანამშრომელი იმუშავებს, ოპტიმალურად არის გათვლილი ყველა სეგმენტის კლიენტის ინტერესებზე. როგორც ფიზიკური, ასევე იურიდიული პირები მრავალფეროვან საბანკო მომსახურებას ერთ ოპერატორთან, სწრაფად და კომფორტულ გარემოში მიიღებენ. სხვადასხვა ტიპის შეხვედრების ოთახები, გამორჩეული თანამედროვე დიზაინის ელემენტებით, მაქსიმალურად მორგებულია კლიენტების მოთხოვნებზე და კვალიფიციური კონსულტაციებისა და მომსახურების გაწევის საშუალებას იძლევა.
აღსანიშნავია ის ფაქტი, რომ ახალ ფილიალში თავს მოიყრის ყველა ის ბიზნეს კლიენტთა მრჩეველი, რომლებიც მთელი რეგიონის ბიზნეს კლიენტებს ემსახურებოდნენ, შესაბამისად ერთ ფილიალში ვიზიტით ყველანაირი საჭირო ოპერაციის განხორციელებით მომხმარებელი მნიშვნელოვნად დაზოგავს დროს.
ფილიალში ასევე ფუნქციონირებს საბანკო ტექნოლოგიებით აღჭურვილი თვითმომსახურების ზონა, რაც კლიენტებს შესაძლებლობას აძლევს კვირაში 7 დღე, 24 საათის განმავლობაში ისარგებლონ სხვადასხვა დისტანციური არხებითა და საბანკო სერვისებით.
"საზოგადოებაში, პროკრედიტ ბანკი უკვე კარგად არის ცნობილი როგორც ყველაზე პასუხისმგებლიანი საკუთარი საქმიანობის ყველა მიმართულებაში, იქნება ეს საბანკო მომსახურება თუ ჩვენი ფილიალის მშენებლობა. ვიცოდით, რომ შენობას ბათუმელებისთვის ისტორიული მნიშვნელობა ჰქონდა და ამიტომაც ორმაგი სიფრთხილით მოვეკიდეთ სარემონტო სამუშაოების მიმდინარეობას. არც ერთი გადაწყვეტილება არ მიგვიღია ბათუმის მერიისა და კულტურული მემკვიდრეობის დაცვის სამსახურისაგან დამოუკიდებლად. შენობა არც თუ ისე სახარბიელო მდგომარეობაში იყო, გამაგრებითი სამუშაოების ჩატარება გამოცდილ და კვალიფიციურ პერსონალს ვანდეთ. ვფიქრობ შედეგიც სახეზეა, ნაგებობის ძველი იერსახე შევინარჩუნეთ და საბოლოოდ ძალიან ლამაზი და რაც მთავარია, მყარი შენობა მივიღეთ. ბათუმის მოსახლეობასა და ჩამოსულ სტუმრებს ფილიალი მაღალი დონის სრულ საბანკო მომსახურებას შესთავაზებს"- აცხადებს "პროკრედიტ ბანკი" საქართველოს გენერალური დირექტორი საშა ტერნესი.
აღსანიშნავია, რომ დღეიდან ბათუმის მოსახლეობასა და ტურისტებს მემედ აბაშიძის #38-ში (დემეტრე თავდადებულის #19) მდებარე ფილიალი კვირის დღეებში 09:30-19:00 საათამდე, ხოლო შაბათს 10:00-დან 14:00 საათამდე მოემსახურებათ.