შიდა ქართლის სამხარეო მთავარი სამმართველოს, ხაშურის, კასპის და ქარელის რაიონული სამმართველოების თანამშრომლებმა, ერთდროულად ჩატარებული ოპერატიულ-სამძებრო ღონისძიებების შედეგად, პროსტიტუციისათვის ადგილის გადაცემის ფაქტზე სხვადასხვა კაფე-ბარის სამი მფლობელი: 1976 წელს დაბადებული მარინე ი, 1970 წელს დაბადებული ლელა გ. და 1978 წელს დაბადებული ხათუნა ა. ამხილეს.
გამოძიებამ დაადგინა, რომ ხათუნა ა. - ქარელში, მარინე ი. - ხაშურში, ხოლო ლელა გ. - კასპში, საავტომობილო მაგისტრალზე მდებარე კაფე-ბარებში ოთახებს პროსტიტუციისათვის აქირავებდნენ.
აღნიშნულ დაწესებულებებში მომუშავე 22 ქალბატონი, გამოძიების ფარგლებში, მოწმის სტატუსით დაიკითხა. მათგან ერთი - ყირგიზეთის, სამი - უზბეკეთის და ორი აზერბაიჯანის მოქალაქეა .
გამოძიება პროსტიტუციისათვის ადგილის ან საცხოვრებელის გადაცემის ფაქტზე მიმდინარეობს (სსსკ-ის 254-ე მუხლით).
