საქართველოს ბანკმა და ევროპის რეკონსტრუქციისა და განვითარების ბანკმა (EBRD) ხელი მოაწერეს სასესხო ხელშეკრულებას 10 მილიონი აშშ დოლარის მოცულობით EBRD-ს კავკასიის ენერგო ეფექტურობის პროგრამის ფარგლებში (CEEP). სესხი, რომლის ვადაც 5 წელს შეადგენს მოხმარდება კერძო საწარმოებზე კრედიტების გაცემას, ენერგო ეფექტურობასა და ენერგიის გონივრულ მოხმარებაზე მიმართულ ინვესტიციებს დასაფინანსებლად. ავსტრიის მთავრობა და ევროკავშირი, სამეზობლო ინვესტიციის რესურსის ("NIF") ფარგლებში, უზრუნველყოფენ ტექნიკურ თანამშრომლობასა და საგრანტო მხარდაჭერას, დააფინანსებენ ტექნიკურ დახმარებას მსესხებლებისთვის.
EBRD ასევე გამოყოფს 10 მილიონი ევროს მოცულობის დაფინანსებას მისი ვაჭრობის ხელშეწყობის პროგრამის (TFP) ფარგლებში, რათა მხარი დაუჭიროს საერთაშორისო ფაქტორინგის შეთავაზებას ბაზარზე.
"საქართველოს ბანკს აქვს მიღებული კორპორატიულ კლიენტებზე ენერგო ეფექტურობის სესხების გაცემის წარმატებული გამოცდილება, ბანკის დიდი ხნის პარტნიორთან და აქციონერთან, EBRD-სთან CEEP-ის პირველი შეთანხმების ფარგლებში. საქართველოს ბანკი განაგრძობს დაფინანსების უზრუნველყოფას ბიზნესებისთვის და შესაძლებობას აძლევს მათ დანერგონ ენერგიის დამზოგავი ტექნოლოგიები, რათა გააუმჯობესონ საკუთარი კონკურენტულობა," განაცხადა ირაკლი გილაურმა, საქართველოს ბანკის გენერალურმა დირექტორმა. "საქართველოს ბანკმა პირველმა ქვეყანაში შესთავაზა ბაზარს ფაქტორინგი 2007 წელს და მე ძალიან მოხარული ვარ, რომ საერთაშორისო ფაქტორინგის შეთავაზება EBRD-ს TFP-ის ფარგლებში შესაძლებლობას მიცემს საქართველოს ბანკს გაზარდოს კორპორატიული კლიენტებისთვის განკუთვნილი პროდუქტების სპექტრი და წვლილს შეიტანს ბანკის საერთაშორისო სავაჭრო ოპერაციების გაფართოებაში".
"EBRD მოხარულია ითანამშრომლოს მისი დიდი ხნის პარტნიორ ბანკთან და გააგრძელოს რეალური ეკონომიკის დაფინანსება, კერძოდ ენერგო ეფექტურობის დაკრედიტება. EBRD-სთვის მნიშვენლოვანია მდგრადი ენერგიის დაფინანსების ბაზრის განვითარება, ისევე როგორც ვაჭრობის ფინანსირების ფორმის საბანკო საქმიანობის შემდგომი პოპულარიზაცია საქართველოში. საქართველოს ბანკი ტრადიციულად ერთ-ერთი ყველაზე აქტიური ბანკია TFP-ს კუთხით საქართველოში, ზრდის მაჩვენებლისა და მყარი რეპუტაციის მქონე, ბაზრის მნიშვნელოვანი მოთამაშეა", განაცხადა ბრუნო ბალვანერამ, EBRD-ის დირექტორმა კავკასიაში, მოლდოვასა და ბელორუსში.
საქართველოს ბანკი ქვეყნის უმსხვილესი ბანკია 36.1% საბაზრო წილით მთლიანი აქტივების მიხედვით, 2013 წლის 31 მაისის მდგომარეობით. ბანკს აქვს 194 სერვისცენტრი, 479 ბანკომატი- ქვეყანაში ბანკომატების ყველაზე მსხვილი ქსელი და 759 Express Pay (თვითმომსახურების) ტერმინალი. ბანკი ემსახურება დაახლოებით 1 მილიონ კლიენტთა ანგარიშს. 2012 წლის თებერვლიდან, საქართველოს ბანკის ჰოლდინგური კომპანია Bank of Georgia Holdings PLC-ის აქციები განთავსებულია ლონდონის საფონდო ბირჟის პრემიუმ სეგმენტში.
