სამშაბათს, 11 ნოემბერს, პაკისტანის დედაქალაქ ისლამაბადში თვითმკვლელმა ტერორისტმა თავი აიფეთქა, რის შედეგადაც სულ მცირე 12 ადამიანი დაიღუპა და 27 დაიჭრა.
ამის შესახებ ჟურნალისტებს ქვეყნის შინაგან საქმეთა მინისტრმა მოჰსინ ნაკვიმ განუცხადა.
მისი თქმით, ტერორისტმა თავდაპირველად დედაქალაქის სასამართლოს შენობაში შესვლა სცადა, თუმცა „ვერ შეძლო და შენობის მახლობლად მდებარე ავტოსადგომზე პოლიციის მანქანას თავს დაესხა“.
პოლიციის ცნობით, აფეთქებას ძირითადად გამვლელები ან სასამართლო სხდომებზე მისული ადამიანები ემსხვერპლნენ.
„ჩვენ ამ ინციდენტს მრავალი მხრიდან ვიძიებთ. ეს უბრალოდ კიდევ ერთი აფეთქება არ არის. ეს უბრალოდ კიდევ ერთი აფეთქება არ არის. ეს პირდაპირ ისლამაბადში მოხდა. ვინც არ უნდა ყოფილიყო ამაში ჩართული, ადგილობრივი მაცხოვრებლები თუ სხვა ქვეყნების მოქალაქეები, ისინი დაუსჯელი არ დარჩებიან“, - განაცხადა შინაგან საქმეთა მინისტრმა.
ნაკვიმ ივარაუდა, რომ აფეთქების უკან თალიბანთან და ინდოეთთან დაკავშირებული მებრძოლები იდგნენ.
სააგენტო AP-ის“ცნობით, თავდასხმაზე პასუხისმგებლობა პაკისტანის თალიბანის გამოყოფილმა დაჯგუფებამ „ჯამაათ-ულ-აჰრარმა“ აიღო.
