ჯანდაცვის კომიტეტის სხდომაზე დეპუტატებმა შრომის კოდექსის ახალ ვარიანტში არსებულ სადაო მუხლებზე ვერ შეთანხმდნენ. დეპუტატ კობა დავითაშვილის თქმით ეს კოდექსი რომლის მიღებაც საპარლამენტო უმრავლესობას სურს, არჩევნებამდე ქართული ოცნების დანაპირები არ ყოფილა.
„საპარლამენტო უმრავლესობა იღებს ისეთივე დამახინჯებულ შრომის კოდექს როგორიც ეს ნაციონალური მოძრაობის დროს იყო. მეტიც დასაქმებულის უფლებები აღნიშნული შრომის კოდექსით საგრძნობლად მცირდება. აღნიშნული კოდექსით დასაქმებულმა კვირაში 48 საათი უნდა იმუშავოს, რაც დღეში 9 ნახევარ საათს გულისხმობს, როდესაც ნაციონალური მოძრაობის ხელისუფლება დასაქმებულებს 8 საათი ამუშავებდა. ბიზნესი რომელიც არ არის ოთხი წლის, დამქირავებელს შეუძლია დაქირავებული ერთ კვირიანი ან ერთ თვიანი ხელშეკრულებით აიყვანოს, რაც ვფიქრობ რომ დაქირავებულისთვის დამამცირებელია. ასევე მოვითხოვე კომიტეტის სხდომაზე ამოღებულ იქნას, შრომის კოდექსიდან დამქირვალების მიერ სხვაობიექტური მიზეზით გათავისუფლება, რადგან ნებისმიერ ხელმძღვანელს შეუძლია დაასახელოს რაიმე მიზეზი რომელსაც ობიექტურ გარემოებად შეაფასებს. ეს ეწინააღმდეგება ქართული ოცნების იმ წინაასარჩევნო დაპირებას, რომელსაც თვეების განმავლობაში უხვად გასცემდა. ივანიშვილი ბიზნესმენებს სისტემატიურად ხვდება თავის სასახლეში და საუბრობენ დამსაქმებლის უფლებებზე თუმცა მათ არ ახსენდებათ დასაქმებულის უფლებები რაც სამარცხვინოა", - განაცხადა კობა დავითაშვილმა.
ცნობისთვის, დეპუტატებმა შრომის კოდექსი მეორე მოსმენით გუშინ განიხილეს, თუმცა მუხლობრივი ცვლილებების შეტანა მესამე მოსმენამდეა შესაძლებელი.