ვანო მერაბიშვილის მიმართ პროკურატურის მიერ ბრალის დამძიმების მოთხოვნასთან დაკავშირებით ნაციოლნალური მოძრაობის ლიდერებმა საგანგებო ბრიფინგი გამართეს. გიორგი გაბაშვილის განცხადებით პროკურატურა მერაბიშვილის ბრალის დამძიმებასთან დაკავშირებით საუბრობდა არა როგორ სამართალდამცავი ორგანოს წარმომადგენლები, არამედ პოლიტიკური მხარის წარმომადგენლები.
„მთელი ის განცხადება, რომელიც პროკურატურამ გააკეთა იყო ტყუილზე აგებული. მაშინ როცა ისინი ამბობენ რომ 26 მაისის ღამეს აქციაზე მშვიდობიანი მოქალაქეები იყვნენ შეკრებილი, მე მახსენდება ის კადრები როცა აქციის მონაწილეების უმრავლესობას ხელში ხელკეტები ეჭირა. ასევე შეუძლებელია არ გაიხსენო, ის ლეგალური სატელეფონო მოსმენა როცა აქციის ორგანიზატორები ერთმანეთს ღიად და დაუფარავად უცხადებდნენ, რომ ქვეყნის საკანონმდებლო ორგანოს აღება სურდათ. განსაკუთრებით ამაზრზენი იყო პროკურატურის ის განცხადება, თითქოსდა სამართალდამცველების მხრიდან ძალადობის შედეგად 2 მშვიდობიანი ადამიანი გარდაიცვალა. რატომღაც პროკურატურას დღეს არ გაახსენდა, რომ იგივე აქციაზე ნინო ბურჯანაძის მეუღლის ექსკორტმა ასევე მშვიდობიანი მოქალაქე გაიტანა. საერთო ჯამში შეგვიძლია ვთქვათ, რომ პროკურატურის თითოეული ბრალდება ბრალის დამძიმების გამო უსაფუძვლოა" განაცხადა გიორგი გაბაშვილმა.
