,,ყოფილი მაღალჩინოსნების დაკავება ვილნიუსის სამიტზე ნეგატიურ გავლენას ვერ მოახდენს", _ამის შესახებ ჟურნალისტებთან საგარეო საქმეთა მინისტრის მოადგილემ თამარ ბერუჩაშვილმა განაცხადა და აღნიშნა, რომ საქართველომ დემოკრატიული განვითარების განსაკუთრებული სტანდარტი აჩვენა და ეს ფაქტი ევროკავშირის მხრიდან ყურადღების საგანია.
,,ნამდვილად მოვერიდებოდი ამ სპეკულაციებს, რომ კონკრეტული პირის დაკავება იქნება განსაკუთრებული მომენტი და შეაფერხებს პოლიტიკურ პროცესებს. ეს ყველაფერი დამოკიდებულია იმაზე, რამდენად წარმატებულად ასრულებს საქართველო თავის ვალდებულებებს. როგორც უკვე გაცხადდა მთავრობის მხრიდან, შესაბამისი უწყებები უზრუნველყოფენ გამჭვირვალე გამოძიებას საერთაშორისო სტანდარტებისა და საქართველოს კანონმდებლობის შესაბამისად", - განაცხადა თამარ ბერუჩაშვილმა და აღნიშნა, რომ მთავრობა შეძლებს საერთაშორისო საზოგადოება დაარწმუნოს, რომ ყოფილი მაღალჩინოსნების დაკავება კანონიერების საზღვრებს არ სცილდება.
