ოკუპირებული აფხაზეთის ე.წ. საგარეო საქმეთა სამინისტრო საქართველოს პრეზიდენტის განცხადებას იმის შესახებ, რომ ვანუატუმ აფხაზეთის დამოუკიდებლობის აღიარების გადაწყვეტილება გააუქმა, სააკაშვილის ფანტაზიას უწოდებს.
"მართლაც, ვანუატუს მთავრობაში არსებობს განსხვავებული აზრები აფხაზეთის დამოუკიდებლობის აღიარებასთან დაკავშირებით, თუმცა ჩვენს ქვეყნებს შორის დიპლომატიური ურთიერობების გაწყვეტის გადაწყვეტილება მიღებული არ ყოფილა", _ განაცხადა ჟურნალისტებთან საუბარში აფხაზეთის ე.წ. საგარეო საქმეთა მინისტრის მოადგილემ ირაკლი ხინთბამ.
მისივე თქმით, ის რაც ვანუატუს პრემიერ-მინისტრმა მიხეილ სააკაშვილთან საუბრის დროს განაცხადა, არის პრემიერის პირადი აზრი და არა ხორცშესხმული სახელმწიფოებრივი გადაწყვეტილება.
ხინთბამ აღნიშნა, რომ ვანუატუ დღეს "დიდი ზეწოლის ქვეშ იმყოფება".
"აფხაზეთის საგარეო საქმეთა სამინისტრო თავისი შესაძლებლობების ფარგლებში ყველა საჭირო ღონეს ხმარობს პოლიტკურ-დიპლომატიური პროვოკაციების თავიდან აცილების მიზნით", _ აცხადებს ირაკლი ხინთბა.
მასალის გამოყენების პირობები