"დღეს როგორც არასდროს ჩვენ უნდა გამოვიჩინოთ აზერბაიჯანის მიმართ სოლიდარობა - ეს არის საქართველოს სტრატეგიულ ინტერესებში", _ განაცხადა საქართველოს პრეზიდენტმა მიხეილ სააკაშვილმა რუსეთის პრემიერ-მინისტრის გადაწყვეტილების - რუსეთის ტერიტორიაზე აზერბაიჯანის ნავთობისთვის სატრანზიტო გზის გაუქმების შესახებ კომენტირებისას. მიხეილ სააკაშვილი რუსეთის ამ გადაწყვეტილებას აშშ-დან გამოეხმაურა.
"რუსეთის მთავრობამ გამოაცხადა, რომ აზერბაიჯანის ნავთობს აღარ გაატარებს რუსეთის ტერიტორიაზე. ეს არის ზეწოლის იმავე სერიიდან, რომელიც განხორციელდა წინა წლებში უკრაინაზე, მოლდოვაზე, საქართველოზე, რის შედეგადაც მათ შორის ამ ზეწოლის შედეგად მოხდა ამ სამ ქვეყანაში პროდასავლური მთავრობის შეცვლა", _ აცხადებს საქართველოს პრეზიდენტი და აღნიშნავს, რომ ამჟამად, რუსეთის მთავარი სამიზნე - აზერბაიჯანია.
"ახლა მთავარი სამიზნე არის აზერბაიჯანი, რასაც მე დიდი ხანია უკვე ვიძახი. თუ აზერბაიჯანი დაეცა, მაშინ რეგიონს პერსპექტივა მოესპობა და პირიქით, თუ აზერბაიჯანი გაძლიერდა, გაძლო და გააგრძელა განვითარება ჩვენ ყველას ბევრად უფრო უკეთესი პერსპექტივა გვექნება მომავალში და ეს რუსეთის დღევანდელმა მთავრობამ იცის. მათ ჩაკეტეს აზერბაიჯანის ნავთობი ახლა რუსეთის ტერიტორიაზე.
თავის დროზე, როდესაც რუსეთმა ჩაგვიკეტა ჩვენ დენი და გაზი, მაშინ აზერბაიჯანმა გათიშა თავისი მოსახლეობა და საქართველოს გაუყო თავისი გაზი და ენერგია. ამიტომ დღეს როგორც არასდროს ჩვენ უნდა გამოვიჩინოთ აზერბაიჯანის მიმართ სოლიდარობა - ეს არის საქართველოს სტრატეგიულ ინტერესებში", _ აცხადებს მიხეილ სააკაშვილი და კიდევ ერთხელ აღნიშავს, რომ ყარსი ახალქალაქის რკინიგზა პრაქტიკულად შეაჩერა საქართველოს მთავრობამ.
"მე რამდენიმე თვეა ამას ვიძახი და ყოველ ჯერზე იძახიან, რომ მე არა მაქვს ამის შესახებ ინფორმაცია და პრაქტიკულად ვცუობ, მაგრამ ფაქტი ფაქტია, შეგიძლიათ ყველა წახვიდეთ და ნახოთ - რკინიგზის მშენებლობა არის შეჩერებული. პრაქტიკულად ჩვენ ვართ ამოვარდნილი გრაფიკიდან - უჩხიკინებენ რაღაც უაზროდ ამ რკინიგზის კომპანიას და ცდილობენ იქ ხელების ფათურს, მათ შორის სრულიად გამოუცნობი სუბიექტები და ამას ეწირება საქართველოს სტრატეგიული ინტერესები და ამას ყველაფერს უდის სხვა ქვეყნის ინტერესების და არც თუ ისე კარგი რაღაცეების სუნი.
იმის ფონზე რაც რუსეთმა გააკეთა, როგორც არასდროს ჩვენ უნდა დავაჩქაროთ რკინიგზის მშენებლობა იმიტომ, რომ ეს არის არა მხოლოდ აზერბაიჯანის ინტერესი - პირველ რიგში საქართველოს ინტერესებში. იმიტომ, რომ საქართველოს სჭირდება დამოუკიდებელი წყაროები ჩვენი სტრატეგიული გალიერების, ენერგეტიკის, ტრანსპორტირების და ახლა როგორც არასდროს ჩვენ ვჭირდებით ერთმანეთს ამ საერთო ზეწოლის ფონზე", _ აცხადებს პრეზიდენტი.
მისივე თქმით, ითქვა ისიც, რომ ეს არის ზოგადი განცხადება და სააკაშვილი ტყუილად ტეხავს ამბავს.
"ზოგადი განცხადება ამ თემაზე არ არსებობს. ეს არის ძალიან მგრძნობიარე და კონკრეტული თემა.
თუ ჩვენ ვამბობთ, რო მართო აზერბაიჯანი არ შეიძლება იყოს და ჩვენ ალტერნატივაც გვინდა - ალტერნატივა არის რუსული გაზი.
რუსული გაზი არის 450 დოლარი, აზერბაიჯანული გაზი არის 130-140 დოლარი და აზერბაიჯანმა რომ თქვას ა, ალტერნატივა გინდათ? და თუ კონკურენცია გინდათ მაშინ 450-500 თუ არის რუსული ჩვენ მოგცემთ 400-ად. ეს არის ამის გაუაზრებელი შედეგები.
დარწმუნებული ვარ რომ აზერბაიჯანი ამას არ იტყვის მაგრამ არ შეიძლება ასეთ თემებთან თამაში. რუსეთი არ არის ჩვეულებრივი ქვეყანა, რუსეთი არის საქართველოს ტერიტორიის დამპყრობელი, რომელმაც ერთხელ უკვა სცადა ჩვენი მოხრჩობა ენერგეტიკული ბერკეტების გამოყენებით. ამიტომაც, გაკარებაც კი რაღაც იდეის დონეზე, რომ რაღაც ნაწილი ჩანაცვლდეს რაღაც სხვა, რუსული გაზით საქართველოსთვის არის კატასტროფულად საშიში", _ აცხადებს მიხეილ სააკაშვილი და აღნიშნავს, რომ თუ საქართველოს სხვა ალტერნატივები უნდა, მან თურქმენეთთან, ყაზახეთთან, რეგიონის სხვა ქვეყნებთან უნდა იმუშაოს - მაგრამ არ ერთ შემთხვევაში რუსეთთან. "რუსეთთან ჩვენი ერთ ერთი მთავარი მიღწევა არის ენერგეტიკული დამოუკიდებლობის მიღწევა, რადაც ვერ მიაღწია აბსოლუტურმა უმეტესობამ, ამიტომაც დასჭირდა შემდეგ რუსეთს ომით შემოსხვლა, იმიტომ, რომ ყველა სხვა ბერკეტი დაკარგა და ახლა უკან დავუბრუნოთ ეს ბერკეტები? ამით რას მივიღებთ და რაც მოვიგებთ ჩვენი ეროვნული ინტერესებისთვის? ", _ აცხადებს საქართველოს პრეზიდენტი.
მასალის გამოყენების პირობები