აფხაზეთის ე.წ. მოქალაქის პასპორტების გაცემის პროცესი ტყვარჩელისა და გალის რაიონებში შეჩერებულია. ინფორმაციას ამის შესახებ აფხაზური მედია ავრცელებს. მათივე ინფორმაციით, ასევე შეჩერებულია დოკუმენტების მიღების პროცესი ე.წ. მოქალაქეობის მისაღებად.
"ასეთი გადაწყვეტილება იქნა მიღებული დღეს სახელმწიფო კომისიის პირველ სხდომაზე, რომელიც გალისა და ტყვარჩელის რაიონებში მცხოვრები მოქალაქეებისათვის პასპორტების გაცემის კანონთან შესაბამისობას ამოწმებს", _ იუწყება აფხაზური მხარე.
კომისიის თავმჯდომარის მიხაილ ლოგუას განმარტებით, გამონაკლისი შეიძლება შეადგინონ გალის რაიონის სკოლადამთავრებულებმა, რომლებიც ადგილობრივ სასწავლებლებში აბარებენ.
კომისიის მიერ შექმნილი სამუშაო ჯგუფი ადგილებზე განახორციელებს შემოწმებას. კომისიის მორიგი სხდომა ივნისის ბოლოს იგეგმება.
მასალის გამოყენების პირობები