"ჩვენ ყველაფერი მოვითხოვეთ, მაგრამ, სამწუხაროდ, მინისტერიალის დღის წესრიგში რუსეთ-საქართველოს კონფლიქტის საკითხის შეტანა ვერ მოხერხდა"
საქართველოს საგარეო საქმეთა მინისტრი მაია ფანჯიკიძე ვეროპის საბჭოს მინისტერიალის დღის წესრიგში რუსეთ-საქართველოს კონფლიქტის საკითხის არშეტანასთან დაკავშირებით განმარტებებს აკეთებს და აცხადებს, რომ ეს არ ყოფილა პირველი შემთხვევა, როცა საკითხი მინისტერიალზე არ დადგა.
"ბოლო წლების პრაქტიკაში ეს საკითხი მინისტერიალის დღის წესრიგში ყოველთვის არ ყოფილა. მაგალითად, 2011 წელს სტამბოლის მინისტერიალზე ეს საკითხი დასმული არ იყო. აქედან გამომდინარე, ამას ვერ ვიტყვით, რომ ახალი ხელისუფლების პირობებში მოხდა ცვლილება. მთავარია ის, რომ ევროპის საბჭოს დღის წესრიგში ყოველთვის იქნება დასმული საკითხი "ევროპის საბჭო და კონფლიქტი საქართველოში". ეს იქნება მინისტრთა მოადგილეების კომიტეტის შემადგენელი ნაწილი. გარდა ამისა, იქნება გენერალური მდივნის კონსოლიდირებული მოხსენება, რომელიც ამ საკითხს მიეძღვნება. აქედან გამომდინარე, მინისტერიალის დღის წესრიგიდან საკითხის ამოღება არანაირად არ უქმნის საფრთხეს მინისტრთა მოადგილეების კომიტეტის დღის წესრიგში საკითხის მუდმივად ყოფნას და აგრეთვე, კონსოლიდირებულ მოხსენებას. ამასთან, მეც მივემგზავრები მინისტერიალზე და ჩემს გამოსვლაში გაკეთდება ყველა ის აქცენტი, რომელიც საჭიროა", - განაცხადა ფანჯიკიძემ.