სამწუხაროა, თუ ევროსაბჭოს მინისტერიალზე რუსეთ-საქართველოს საკითხი დღის წესრიგში შეტანილი არ არის, თუმცა ამის დრამატიზება არ ღირს - ჩვენ ახლავე დავუკავშირდებით სტრასბურგს. განაცხადა სააგენტო "ჯი-ეიჩ-ენთან" საუბრისას საქართველოს პარლამენტის საგარეო ურთიერთობათა კომიტეტის თავმჯდომარემ თედო ჯაფარიძემ საქართველოს ყოფილი ელჩი ევროპის საბჭოში მამუკა ჟღენტის მიერ გავრცელებული ინფორმაციის კომენტირებისას.
"სამწუხაროა, თუ ეს ასეა, რა თქმა უნდა. ევროსაბჭოს სესია ეს მაისში კი არა ივნისში გაიმართება და, ტრადიციულად, საქართველოს საკითხი ყოველთვის იყო დღის წესრიგში და განსაკუთრებით ისეთი მწვავე, როგორიც ქართულ-რუსული ურთიერთობებია. ამის დრამატიზირებას მე არ მოვახდენდი, იმიტომ, რომ დღის წესრიგი, მოგეხსენებათ, ეს მხოლოდ პროექტის სახით არის ჯერ. დიდი მადლობა, რა თქმა უნდა ბატონ მამუკა ჟღენტს ვინაიდან მან გაახმოვანა ეს ფაქტი. ჩვენ გვყავს საელჩო სტრასბურგში, რომელიც დაკავშირებულია ევროსაბჭოს ბიუროკრატიასთან და ინსტიტუტებთან და იმედია, რომ ჩვენი საელჩოც იმუშავებს, ჩვენი საგარეოც, კომიტეტიც იმუშავებს. რა თქმა უნდა, მე როგორც დელეგაციის თავმჯდომარე, აუცილებლად მივწერ ბატონ მინიონს, ევროსაბჭოს საპარლამენტო ასამბლეის პრეზიდენტს, ამის თაობაზე და დამერწმუნეთ, რომ ყველაფერი რიგზე იქნება და საქართველოს საკითხი განხილული იქნება მომავალ მინისტერიალზე", _ აცხადებს "ჯი-ეიჩ-ენთან" საუბარში ჯაფარიძე და კითხვაზე დღის წესრიგი თვითონ დგება თუ ჩვენ უნდა გაგვეკეთებინა განაცხადი განმარტავს, რომ "დღის წესრიგს ადგენს ევროსაბჭოს სამდივნო. რა თქმა უნდა, ამასთან დაკავშირებით აქტიურად ჩართულია ჩვენი საელჩო, მე ახლა მათაც დავუკავშირდები და ამაში სათანადოდ ჩართულია ჩვენი საგარეოც და ჩვენც ვინაიდან ჩვენ ვართ უშუალო მონაწილეები ამ პროცესის", _ აცხადებს ჯაფარიძე სააგენტოსთან საუბარში.
შეგახსენებთ, რომ საქართველოს ყოფილმა ელჩმა ევროპის საბჭოში მამუკა ჟღენტმა ღია წერილი გამოაქვეყნა, რომელშიც განაცხადა, რომ არ არსებობს არგუმენტი იმის გასამართლებლად, რომ რუსეთ-საქართველოს საკითხი ევროპის საბჭოს მინისტერიალის დღის წესრიგში შეტანილი არ არის.