2013 წლის 1-7 მაისს, შედგა საქართველოს საგარეო საქმეთა მინისტრის პირველი მოადგილის, დავით ზალკალიანის ვიზიტი ქ. ნიუ-იორკში. ვიზიტის მიზანს წარმოადგენდა გაერო-ს ფარგლებში საქართველოსათვის თანამშრომლობის აქტუალური საკითხების განხილვა, როგორც გაერო-ს ისე რიგი სახელმწიფოების წარმომადგენლებთან.
ვიზიტის ფარგლებში დავით ზალკალიანი შეხვდა პოლიტიკურ საკითხებში გაერო-ს გენერალური მდივნის მრჩეველს ოსკარ ფერნანდეს-ტარანკოს, გაერო-ს გენერალური ასამბლეის პრეზიდენტს ვუკ იერემიჩს, ასევე გაერო-ს პოლიტიკური დეპარტამენტის აღმოსავლეთ ევროპის სამმართველოს უფროსს ელიზაბეთ სპეჰარს და გაერო-ს ლტოლვილთა უმაღლესი კომისარიატის წარმომადგენლებს.
დავით ზალკალიანმა ასევე გამართა 50-მდე ორმხრივი შეხვედა პარტნიორი სახელმწიფოების წარმომადგენლებთან, სადაც მხარეებმა განიხილეს ორმხრივი და მრავალმხრივი თანამშრომლობის აქტუალური საკითხები.
შეხვედრებზე განსაკუთრებული ყურადღება დაეთმო „აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო ლტოლვილთა და იძულებით გადაადგილებულ პირთა სტატუსის შესახებ" გაერო-ს გენერალური ასამბლეის ყოველწლიურ რეზოლუციას და მისი მხარდაჭერის საკითხს.
