"საქართველოს ნატოში არავინ მიიღებს", - ამის შესახებ განცხადება "პირველი რადიოსათვის" მიცემულ ექსკლუზიურ ინტერვიუში საქართველოს საზღვრის დაცვის დეპარტამენტის ყოფილმა ხელმძღვანელმა ვალერი ჩხეიძემ გააკეთა.
ჩხეიძის თქმით, ერთადერთი სწორი გზა, რომელიც შეიძლება ამ ეტაპზე ქვეყანამ აირჩიოს ეს სრული ნეიტრალიტეტია. როგორც "პირველი რადიო" იტყობინება, საზღვრის დაცვის დეპარტამენტის ყოფილი ხელმძღვანელი, საქართველოში დაბრუნებას უახლოეს მომავალში გეგმავს და მზად არის ქვეყნის ახალ მთავრობას კონსულტაციები გაუწიოს, თუმცა გენერალ-ლეიტენატი ჩხეიძე კატეგორიულად გამორიცხავს საზღვრის დაცვის დეპარტამენტში უკან სამუშაოდ დაბრუნებას.
"ცალსახად გეტყვით, რომ ნატოში ჩვენ არავინ არ მიგვიღებს. ამას როგორც გენერალ ლეიტენატი ისე გეუბნებით. იმის ილუზია ნურავის ნუ ექნება, რომ ნატოში ხვალ მიგვიღებენ. ამაში ღრმად ვარ დარწმუნებული. პირადად ჩემი პოზიცია ასეთია, რომ კარგი იქნება, რომ საქართველომ ნელ-ნელა იფიქროს და გადადგას ის პოლიტიკური ნაბიჯი და აქტიურ ნეიტრალიტეტზე იფიქროს. ანუ კარგი ურთიერთობა დასავლეთ ევროპის ქვეყნებთან, კარგი ურთიერთობა რუსეთის ფედერაციასთან და ყველა მეზობელთან"- განმარტა ჩხეიძემ.
