პარლამენტის თავმჯდომარემ პრეზიდენტის მიერ ორ კანონპროექტზე ,,საერთო სასამართლოების შესახებ" და ,,ნაფიც მსაჯულის ინსტიტუტთან" დაკავშირებით ვეტოს დაძლევის პროცედურები განმარტა. როგორც უსუფაშვილმა ჟურნალისტებთან ,,ქორთიარდ მარიოტში" განმარტა, ამ ეტაპზე დეპუტატებმა პრეზიდენტის შენიშვნები უნდა განიხილონ.
,,ჩვენი კანონმდებლობა და პროცედურები გვავალდებულებს კენჭისყრაზე დავაყენოთ პრეზიდენტის მიერ შემოთავაზებული ვერსია, ეთანხმება თუ არ ეთანხმება პარლამენტი მის ცვლილებებს. თუ დაეთახმა, მაშინ კანონი მიღებულად ჩაითვლება იმ სახით როგორ პრეზიდენტმა ჩაასწორა. თუ არ დაეთანხმა, ამის შემდეგ დგება ვეტოს დაძლევის საკითხი და კენჭისყრა. ასეთ შემთხვევაში პარლამენტს სჭირდება 89 ხმა, ზოგადად 90, მაგრამ რადგან სამი პარლამენტის წევრი გვაკლია და 150 არ არის, აქედან გამომდინარე 3/5 აითვლება 147-დან", _განაცხადა უსუფაშვილმა და აღნიშნა, რომ დეპუტატებმა ვეტოს დაძლევას თუ მხარი დაუჭირდეს ამის შემდეგ კანონი პრეზიდენტს უკვე ხელმოსაწერად გადაეგზავნება.
დავით უსუფაშვილის განმარტებით, იგი პრეზიდენტის შენიშვნებს არ იზიარებს.
,,მე პრეზიდენტის მოსაზრებებს არ ვიზიარებ და კოლექტიური მოსაზრება დაფიქსირდება მაშინ, როცა პარლამენტში მოხდება ამ საკითხის განხილვა", -განაცხადა უსუფაშვილმა.
მასალის გამოყენების პირობები