ივნისის თვეში, ექვს თვითმმართველ ერთეულში მათ შორის თბილისის საკრებულოში შუალედური არჩევნები აღარ ჩატარდება. მიზეზი ირინა იმერლიშვილის გადაწყვეტილებაა. როგორც ,,პრაიმ ტაიმის" პრესკლუბში პარლამენტის წესებისა და საპროცედურო საკითხთა კომიტეტის თავმჯდომარემ ირინა იმერლიშვილმა განაცხადა, მას "საარჩევნო კოდექსში" შესატანი ცვლილებების პროექტი, რომლითაც მთლიანად იცვლება საკრებულოებში გამოლებული მაჟორიტარი დეპუტატის ადგილმონაცვლის არჩევის წესი, უკან გააქვს.
მისივე განმარტებით, იმის გამო, რომ ცენტრალური საარჩევნო კომისიის მხრიდან გამოითქვა მოსაზრება, ტექნიკური ხასიათის პრობლემების წარმოქმნის შესახებ, გადაწყდა, რომ "საარჩევნო კოდექსში" შესატან ცვლილებებს პარლამენტი ამ ეტაპზე აღარ მიიღებს.
"შექმნილია ინტერფრაქციული ჯგუფი, რომელიც საარჩევნო საკითხებზე მუშაობს და აღნიშნული საკითხიც ინტერფრაქციული ჯგუფის ფარგლებში განხილვის საგანი იქნება. ის წარმოადგენს ამ ცვლილებას საარჩევნო კანონმდებლობაში შესატანი ცვლილებების პროექტის ფარგლებში", - განაცხადა იმერლიშვილმა.
შეგახსენებთ, რომ იმერლიშვილის მიერ წარმოდგენილი კანონპროექტი საშუალებას იძლეოდა, როცა საკრებულოს მაჟორიტარული წესით არჩეული, ვადამდე უფლებამოსილება შეწყვეტილი წევრების რაოდენობა სამს მიაღწევს, არჩევნები კანონით დადგენილი წესით ჩატარდებულიყო უახლოეს თებერვალში, ივნისში ან ოქტომბერში. მოქმედი კანონით უფლებამოსილება შეწყვეტილთა რაოდენობა კი ხუთი უნდა იყოს და არჩევნები კი წელიწადში ერთხელ გაიმართება.
