ფინანსთა მინისტრი "ნაციონალურ მოძრაობას" მოსახლეობის შეცდომაში შეყვანაში ადანაშაულებს. როგორც დღეს ფინანსთა მინისტრმა "ნაციონალური მოძრაობის" 4 პუნქტიანი ინიციატივის კომენტირებისას განმარტა, მათ ამ დრომდე ქვეყნის ეკონომიკისთვის პოზიტიური არაფერი გაუკეთებიათ.
"ნაციონალურ მოძრაობას" ვურჩევ, რომ მოსახლეობის შეცდომაში შეყვანას შეეშვას. მათ ჰქონდათ საკმარისი პერიოდი იმისათვის, რომ ქვეყნის ეკონომიკაში ერთი პოზიტიური ნაბიჯი მაინც გადაედგათ. თუმცა ის ყველაფერს აკეთებდა იმისათვის, რომ საქართველოს დაშორებოდა ევროპას"- აღნიშნა ნოდარ ხადურმა.
მისი თქმით, "ნაციონალური მოძრაობა" ხალხს პირდებოდა, რომ 2012 წლის იანვარში საშემოსავლო გადასახადი იქნებოდა 18%, თუმცა არ შეამცირა.
"ჩვენ იმის ნაცვლად რომ გადასახადი შეგვემცირებინა ყველასთვის, შემოვიღეთ დაუბეგრავი მინიმუმი, რაც სოციალურად უფრო სამართლიანია, შესაბამისად, ამ საკითხის გადახედვას აღარ ვაპირებთ"- განაცხადა ფინანსთა მინისტრმა.
შეგახსენებთ, რომ ,ნაციონალური მოძრაობა" ხელისუფლებას, ქვეყნის ეკონომიკური სტაბილურობის მიზნით, ოთხ ინიციატივას სთავაზობს. როგორც პარტიის ოფისში გამართულ პრესკონფერენციაზე ,,ნაციონალური მოძრაობის" წევრმა ზურაბ ჯაფარიძემ განაცხადა საუბარია ეკონომიკური დანაშაულის დეკრიმინალიზაციაზე, გადასახადების შემცირებაზე, საექსპერტო ბაზრების გახსნასა და ევროკავშირთან სავაჭრო შეთანხმების გაფორმებაზე.
,,იმისთვის, რომ ქვეყანაში ეკონომიკური სტაბილურობის განცდა გაჩნდეს აუცილებელია გამოცხადდეს ორწლიანი მორატორიუმი ისეთ საკანონმდებლო ცვლილებებზე, რომელებიც გავლენას ახდენენ ქვეყნის ეკონომიკურ გარემოზე. მნიშვნელოვანია, რომ მაკროეკონომიკური მაჩვენებლები შენარჩუნდეს და მოხდეს საექსპერტო ბაზრების გახსნა, რადგან ეს მნიშვნელოვან სტიმულს მისცემს ქვეყანაში ეკონომიკის წინსვლას და მეორე მხრივ ხელს შეუწყობს ახალი სამუშაო ადგილების გაჩენას", -განაცხადა ჯაფარიძემ და აღნიშნა, რომ ასევე უნდა დაჩქარდეს ევროკავშირთან ღრმა და ყოვლისმომცველი სავაჭრო შეთანხმების გაფორმება.