საქართველოს პრეზიდენტი მიხეილ სააკაშვილი სამტრედიასა და ბაღდათში მოსახლეობას შეხვდა და მათთან ქვეყნისთვის მნიშვნელოვან საკითხებზე ისაუბრა.
პრეზიდენტის ადმინისტრაციის ინფორმაციით, იგი საქართველოს პრემიერ-მინისტრის ევროსაბჭოს საპარლამენტო ასამბლეაზე გამოსვლას გამოეხმაურა და განაცხადა, რომ ქვეყნის ტერიტორიული მთლიანობის საკითხით მანიპულირება ყოვლად დაუშვებელია. როგორც მიხეილ სააკაშვილმა აღნიშნა, მისთვის მიუღებელია კოსოვოსა და საქართველოს ოკუპირებულ ტერიტორიებს შორის პარალელის გავლება. ქვეყნის პირველი პირი საქართველოს პარლამენტის ქუთაისიდან გადმოტანის საკითხსაც შეეხო და აღნიშნა, რომ საკანონმდებლო ორგანოს გადატანა ხელს შეუშლის მთელი რეგიონის განვითარებას. საქართველოს პრეზიდენტმა ბათუმის მერიის მოთხოვნაზეც ისაუბრა, რომლის თანახმად ტექნოლოგიური უნივერსიტეტის შენობაში ქალაქის მერია უნდა განთავსდეს. მიხეილ სააკაშვილის თქმით, ეს ახალგაზრდებს პერსპექტივას ართმევს, ხოლო რეგიონს - განვითრების შესაძლებლობას.
