,,მოვუწოდებ პრემიერმინისტრს მე მაკრიტიკოს მაგრამ ტერიტორიული მთლიანობის თემას ნუ ეთამაშება", -განაცხადა ჟურნალისტებთან მიხეილ სააკაშვილმა ბიძინა ივანიშვილის ევროსაბჭოში გამოსვლის კომენტირებისას და აღნიშნა, რომ ამგვარად არ უნდა ილაპარაკოს ქართველმა პოლიტიკოსმა.
,,საქართველოს პრემიერ-მინისტრმა თქვა შემდეგი, რაც ჩემი ყურით მოვისმინე, რომ ერთადერთი განსხვავება არის იმაში, რომ თურმე კოსოვომ დაუშვა საერთაშორისო დამკვირვებლები თავის ტერიტორიაზე, აფხაზეთი და ცხინვალი არ უშვებს დამკვირვებლებს და ამის გამო აფხაზეთსა და ცხინვალს გაუჭირდებათ წარმომადგენლობა ევროსაბჭოს საპარლამენტო ასამბლეაში. მინდა შევახსენო საქართველოს პრემიერ-მინისტრს, რომ კოსოვო და აფხაზეთი განსხვავდება, როგორც ცა და დედამიწა. ასეთი შედარებები შეიძლება გააკეთოს მხოლოდ რუსმა მოღვაწემ და არა რომელიმე საღად მოაზროვნე ევროპელმა პოლიტიკოსმა, მით უმეტეს ქართველმა პოლიტიკოსმა", _განაცხადა მიხეილ სააკაშვილმა და აღნიშნა, რომ ამ სტილის პარალელების გავლება სრულიად მიუღებელია.
,,როდესაც ჩვენი არაკეთილმოსურნე პოლიტიკოსი გეკითხება, რომ საქართველომ ჩაიდინა აგრესია აფხაზებისა და ოსების მიმართ, ამას საქართველოს ლიდერი არ უნდა პასუხობდეს იმით, რომ ჩვენ მართლა ბევრი შეცდომები დავუშვით გასულ წლებში. ეს არ არის ის პასუხი რის მოსმენაც ჩვენგან უნდა მსოფლიოს", _განაცხადა პრეზიდენტმა.
